Macham program ngerichah Hari S’wak

KUCHING: Bisi tujuh batang pengawa deka diatur ba Bintulu beserimbai enggau pengerami ngintu Hari Sarawak.

Unit Kominikasyen Awam Sarawak (Ukas) ba sebengkah penerang berita madahka mengeri minyak enggau gis nya deka nyadi tuai rumah ngintu Hari Sarawak ti deka diintu minggu baru, 22 Julai tu.

Nitihka penerang nya, tu keterubah Hari Sarawak diintu ba luar Kuching lalu peranak Bintulu temegah ati diberi pengandal ngatur pengerami tiga hari berunggu berengkah ari 20 nyentuk 22 Julai ba Padang Bilun Lama Bintulu.

Hari tu diintu menua kitai dikena ngingatka hari kepenudi kuasa koloni British megai menua ba taun 1963 sebedau Sarawak megai perintah kediri.

Entara tujuh bengkah pengawa nya e-Lumba Sarawak (20-22 Julai), ‘Talukka Sarawak Ari Sejarah’ (20-21 Julai), ‘Pelanda Hari Sarawak (21 Julai), Makai Selamat Hari Sarawak (21 Julai), Konsert Kamek Sayang Sarawak’ (21 Julai), Gempuru Besai Hari Sarawak (22 Julai) enggau ‘Pengawa Mandangka Hari Sarawak (23-28 Julai).

Tuai Pemegai Menua (TYT) Tun Pehin Sri Abdul Taib Mahmud enggau bini iya Toh Puan Datuk Patinggi Raghad Kurdi Taib disadang datai ba Pengawa bejadika Hari Sarawak sereta disambut Kepala Menteri Sarawak Datuk Patinggi Abang Johari Tun Openg, bini iya Datuk Amar Juma’ani Tun Tuanku Haji Bujang sereta bala pemesai bukai.

Ba ujung program kelai bejadika batang pengerami deka dipenyadika Tun Taib ditangkan pengawa nyadung tambai Sarawak ngagai mensia mayuh.

Kelimpah ari nya, Tun Taib mega deka bejadika Pengawa Mandangka Hari Sarawak ba Naim Bintulu Paragon ditangkan pengawa nutup e-Lumba ari Abang Johari.

Hari Sarawak keterubah diintu kena taun 2016 lalu diangkat nyadi hari besai di Sarawak lebuh pegai Kepala Menteri Sarawak sebedau Abang Johari iya nya Niang Pehin Sri Adenan Satem.

NIKAL PEMANIS KENANG… Hari Sarawak 2017 diintu ba Kuching