Mahathir badu nganti menua udah terenah

PUTRAJAYA: Menteri Besai Tun Dr Mahathir Mohamad madahka iya deka badu tauka nyurutka diri lebuh menua udah terenah, lantang sereta ulih maju.

“Pekara tu begunaka timpuh dua taun, engka tiga taun aku pan enda nemu tang kami agi beratika pekara tu,” ku iya lebuh ditanya pasal penerang Sapit Presiden PKR Datuk Seri Mohamed Azmin Ali madahka iya patut ngetanka penuduk iya nyadi Menteri Besai nyentuk abis penggal tu.

Lebuh bejaku ngagai pemberita pengudah ngulu randau dagang entarabansa pasal pengereja ditu kemari, Dr Mahathir madahka iya deka ngamatka semaya pasal kemaya deka nyurutka diri enggau berunding ngetanka penuduk iya ungkup penggal tu.

“Bala ketuai parti penyakal ari Umno, Pas enggau Gempung Parti Sarawak (GPS) udah betemu enggau aku kena Hari Dua tu tadi,” ku Dr Mahathir ti nyadi Chairman Pakatan Harapan ngagai pemberita.

“Aku mendingka penerang ti dibantaika bala ketuai lebuh sida betemu enggau aku.

“Meri besai terima kasih laban mayuh sida ti nyukung aku,” ku iya.

Taja pia, Dr Mahathir madahka sida ti nyukung iya ngetanka penuduk tu ukai pekara ti baru laban Presiden PAS Datuk Seri Abdul Hadi Awang suah bejaku pasal pekara tu.

Mohamed Azmin kena Hari Satu tu tadi madahka iya nerima manah penemu gempung PAS-UMNO nyukung Dr Mahathir mengkang nyadi Menteri Besai nyentuk sepenggal, lima taun perintah tembu.

NGANTI MAYA TI PATUT… Dr Mahathir meri penerang lebuh dirandau pemberita.