KUCHING: Sarawak deka datai keterubah iya ba sebengkah eksibisyen dagang tebilang dunya enggau pengawa numbuhka pavilion kediri di IMEX Frankfurt, Jerman berengkah 23 ngagai 25 Mei tu.
Menteri Dagang Temuai, Industri Kreatif enggau Seni Pemerindang Sarawak, Datuk Seri Abdul Karim Rahman Hamzah madah, eksibisyen IMEX disadang digulu 3,000 sida ti ngaga pemutus enggau tuai sektor dagang antarabansa.
“Kami deka ngena manah inisiatif tu enggau meri penyedar pasal Sarawak ngagai dunya luar kelimpah bekerejasama enggau bakih antarabansa baru sereta bulih mayuh agi pemaik ba sektor nya.
“Kami udah netapka nama ti nyelai ungkup pavilion taun tu, Tribe Legacy Sarawak lalu rambai jaku iya, Eksibisyen Dagang Nyukung Pemansang Komuniti.
“Tu pengawa ti manah enggau nyelai pasal dagang kelebih agi ngaul komuniti ungkup pemaik sida,” terang iya.
Karim mansutka jaku nya ba aum pemberita Pengawa Numbuhka Pavilion Pertama Sarawak di Imex Frankfurt 2023, Jerman, ditu kemari.
Nangkan nya, Karim madah, bisi empat pekara deka dipandang ba pavilion nya.
“Tu nyengkaum Strategi Pemansang Pengudah Covid-19 Sarawak (PCDS) 2030; pesaka Sarawak nyadi palan pemadu mujur ba dunya, fokus Sarawak pasal dagang mit enggau jelan pemesai (PKS) enggau gerempung ukai dikuasa perintah (NGO) sereta eksibisyen berambai ke Kuching nyadi Mengeri Gastronomi Unesco Malaysia.
“Pengusung pavilion deka diperindang enggau eksibisyen kreatif ari penyedia pemakai enggau ai irup, The Bibber’s Tale ti deka mandangka pemakai antarabansa pasal penyelai pemakai Sarawak.
“Mensia mayuh ulih ngabas pavilion nya ba reruai B230 lalu betemu enggau enam bakih industri eksibisyen Sarawak ba Palan Aum Borneo Kuching (BCCK), Hotel Pullman Kuching, Hotel Pullman Miri Waterfront enggau Kaunsil Hemisfera,” terang iya.
