Pembantu pergigian maut dalam nahas jalan raya

Main asal Kuntau mesti dipelajar ngambi enda punas

Facebook
Twitter
WhatsApp
Telegram
Email
TABI PUJI…Panglima Ribut benung nyuaka setipit ngagai siku nembiak ke udah mujur nembuka Pelajar Kuntau enggau mujur.
SEMAMPAI NYUKUNG…(ari kanan) Kaunselor Engga, Guro Willie, Peter John @ Panglima Ribut, Olison Rino (Lemambang Muda) begulai bejalaika pengawa miring nikika bala pengabang.

Kuntau siti main asal Iban ke patut ditan lebih agi raban rebak baru ngambika enda punas ditelan jeman diserunyut pemansang teknologi moden.

Kenu ku siku kaban Kelab Kuntau Pencha Ajat Sepring Sarawak, Tapang Bekumbai, Alexander Jampong nyau jarang amat nembiak diatu deka belajarka penemu sebelah babas.

“Pia mega bala guro endang bisi prinsip kediri ngiri penemu ngagai nembiak redak mesti ba kelang enggau disiplin maya ba rumah diri empu sekumbang ke belajar kuntau nyentuk ke tamat.

“Kebuah pia laban pengawa belajarka penemu Kuntau tu bisi penti pemali ke patut dititih.

“Ambika banding enda tau belaya, enda tau bekelakar sereta mayuh agi ke bukai sekumbang timpuh ke belajar,”ku iya nusui ngagai Ruai, Suara Sarawak bekaul enggau pengawa belajarka kelas Kuntau ke baru apus dipelajarka urung 13 iku nembiak nyengkaum iya empu di Sibu.

TABI PUJI…Panglima Ribut benung nyuaka setipit ngagai siku nembiak ke udah mujur nembuka Pelajar Kuntau enggau mujur.

Ngelansa pasal penumbuh Kelab Kuntau Pencha Ajar Sepring Sarawak, Tapang Bekumbai dia Alexander madah kelab tu ditumbuhka Mahaguru Siang anak Megek @ John anak Manju.

“Nyadi John tu udah ngajar mayuh nembiak kenyau iya agi biak kelia nyentuk suah bepindah gelanggang di serata menua Sibu.

“Pengawa dipejalaika Kelab Kuntau tu udah lama tang iya mujur direjister enggau Opis Pengerejister Gerempung (ROS) ba taun 2018.

Ungkup penemu, pengawa ngintu 13 iku nembiak ke baru tamat kelas belajar Kuntau Sepring diatur ba Kelang Salim Belalang Sibu dibaruh ajar Guro Williejam tauka beensumbarka Tapang Bekumbai kena pagi 10 April tu tadi.

Pengawa ngintu sida ke baru tamat Kelas Kuntau nya bisi digulu Panglima Besai Dayak Iban Sarawak, Panglima Ribut @ Peter John Jaban. Penatai iya diambat enggau tabuh basa ari raban Gendang Pampat Sarawak.

Temuai bukai ke bela datai ngulu pengawa tu iya nya Chairman Tajai Sarawak, Timoty Jagak tauka Apai Tajai, Chairman Kemada Sarawak Jackery Hillary Chukan, Kaunselor Ayau ari Dun Dudong, Mahaguru Federick Tutong ke mega Guro Sindang Ujan Panas 48 Sarawak, Mahaguru John Siang iya nya Guro Pencha Ajar Sepring Sarawak, Lemambang Muda Olison Rion bala kaban Kemada, Tajai, Dayak Bukit Kelingkang, Terabai Menua enggau Gendang Pampang Sarawak.

Genap 13 iku nembiak ke baru apus pelajar ngembuan tikas pelajar ke bebida nitihka pengelama sida udah belajar.

Entara bungai kuntau sepring ke bisi diiri ngagai sida tu iya nya Sepring 1 enggau 2, Sepring 12 enggau 24, Bungai 1 enggau 2, Bungai Lang Ngerampas enggau Rimau Mangah, Bungai Tembung enggau Kungfu Sepring, Bungai Preds Kungfu enggau Lapis Sepring 24, Bungai Double Sepring enggau Sepring 24, Bungai Lang Sepring enggau Catepilar Sepring.

Udah nya, pengawa nampung Pelajar Kuntau tu diatur baru kena 15 April tu tadi ba endur ke sama iya nya ba Kelang Salim Belalang, Sibu Jaya.

Kenu ku Alexander sida ke masuk Pelajar Kuntau tu nadai milih umur tauka penempa. Indu lelaki asal sida bisi pengerindu deka belajar Kuntau sigi diterima tang mih sida enda tau enda nitihka atur disiplin tauka penti ke udah ditetapka kelab.

“Raban nembiak Primari 3 pan bisi masuk enggau kelimpah iya pemadu tuai belajar beumur urung 40 taun,” ku iya seraya madah diri udah mujur nembuka pelajar Bungai Kuntau naka tikas ke-6.

Berebak enggau nya, sekeda bala kaban Kelab Kuntau Pencha Ajat Sepring Sarawak, Tapang Bekumbai bela mansutka buah penemu diri bekaul enggau program kelas kuntau ke baru udah abis dipelajarka sida apin lama ke udah.

DONY@UNI ANAK JELANI, 42

“Pengawa belajar kuntau tu siti pengawa asal kitai Iban kenyau ari kelia. Arapka kaul bala guro ulih berserakup ngempung bala nembiak baru begempung rindu belajarka siti ari adat main asal Kitai Dayak ambi enda punas ngapa disegang arus pemansang. Jemah arapka bisi diatur pekit Kuntau ba menua kitai awakka main asal tu ulih dikelala orang luar. Aku masuk kelas Kuntau tu laban deka ngerembaika pengawa lama bansa kitai ngambika meruan dipeda rebak baru.”

ROBIN WILLIAM

“Aku berasai gaga ati laban ulih neruska siti ari main asal Iban ke pemadu beguna dalam pengidup. Kebuah aku belajar Kuntau tu mega laban dikena nyaga diri empu ari pekara ke enda disadang ulih medis sebarang maya. Udah nya, penemu ke diulih tu dikenadal ulih dikena aku nyaga diri sebilik baka bini anak, apai indai tua sereta bala menyadi. Nangkan ke nya, pengawa tu dikena neruska main asal Iban awakka enda lesap disegang pemansang. Bekuntau tu ukai semina bekuntau aja tang tang ulih nempa disilpin tauka pemereti ati ke tinggi ba dalam diri.”

DANIEL ANAK SULTAN, 26

Juluk ati aku enggau masuk kelas Kuntau tu laban penyiruka ke main asal diri. Kelimpah ari nya, aku andal ari belajar Kuntau dia aku ulih ngibun diri enggau mantu raban orang ke tusah. Anang enggai masuk Kelas Kuntau laban nya ulih nyaup ngetanka main asal kitai.”

ALEXANDER ANAK JAMPONG, 32

“Aku ngarapka dudi hari ila pengawa bekuntau tu bisi dipekitka ba lumba ba tikas entarabansa. Enti pengawa tu mujur diadu dia Kuntau Iban tu deka sama tikas enggau Taekwondo, Kungfu, Wushu, Muay Thai, Karate Judo, Kendo, Aikindo enggau ke bukai. Pengawa ngangkatka Kuntau dipasuk ba lumba entarabnsa deka ngujungka Kuntau dikelala dunya luar. Aku ngarapka bansa Dayak terus beserakup, besukung betulung ngangkatka siti ari main asal ke chukup manah baka Kuntau tu. Kitai bansa mega enda tau malu ngaku siti seni nyaga diri ke chukup badas baka tu. Terima kasih bala guro ke udah ngajar lalu aku arapka peneleba ke diulih ari pekit tu ulih neruska legasi bansa, enggau dikena nyaga diri sebilik lebuh dituntung penusah.”

SYLVIA ANAK GAYING, 22

“Pengawa masuk kelas Kuntau tu chukup manah laban ulih meransang diri nyadi berani lebih agi maya betunga enggau bala mayuh. Kelimpah ari nya, pengawa baka tu diperati aku mesti ditampung laban ulih dikena ngetanka adat bansa Dayak awakka enda midang, enda lelang, enda lela dilamun pengerindang pangka perengkaguna moden. Ari bisi penemu Kuntau lebih agi kitai ke indu enda tentu nangi lebuh bisi betapi enggau sebarang pekara ke enda disadang.”

e-Akhbar Suara Sarawak

Berita Berkaitan

E-Paper

27 Mac 2023

Berita Terbaru