Main, lumba nempa modal mensia menyana

SARATOK: Main enggau lumba ulih nempa modal mensia ti menyana sereta ngembuan runding kelas satu, ku Kaban Parlimen Saratok Ali Biju.

Ku iya, main enggau lumba tu ukai semina deka nempa raban nembiak ti gerai batang tubuh tang mega regas ba runding.

“Kitai patut sedar nengah main enggau lumba tu mega ulih ngemansangka modal mensia ti menyana sereta ngembuan runding kelas satu,” ku Ali madah nyemetak.

Iya mansutka jaku tu lebuh bejadika Pekit Main Bol Semilan Sepiak Mangkuk PIBG SK Mendas 2019 diatur ba Padang Bol Sekula Primari (SK) Mendas di Saratok ditu berengkah ari 10 ngagai 12 Ogos tu tadi.

Ba sekali tu ku Ali, Serakup Apai Indai enggau Pengajar (PIBG) sekula nya ngatur pekit dikena ngiga belanja endang patut dipuji enggau disukung.

TERIMA KASIH… Ali (kanan) nerima tepa ari Bundan (tengah) seraya dikemata bala bukai.

“Pengeransing raban PIBG diketuaika Bundan Kabi patut dipuji, disukung lalu ditunda enggau diteladan PIBG sekula bukai.

“Kebuah pia laban, sida tu bisi inisiatif ngiga belanja ungkup serakup bejalaika aktiviti ti ngemai pemaik ngagai bala nembiak enggau sekula nyengkaum komuniti ditu.

“Nya kebuah aku nadai kakang ati nyaup sida ngatur pekit ari bantu belanja penyampau RM10,000 ngambika semua pengawa lanchar,” ku Ali nerang.

Ali mega pechaya, batang tuju pekit tu dikena nempa komuniti ti bepengerai batang tubuh enggau runding seraya ngedutka tanggam kaul bala mayuh.

Pemadu beguna iya nya semengat bemain dalam siti tim laban menang tauka alah nya endang udah adat kitai bepekit lalu patut ngenegapka semengat beserakup, tandu Ali.

KAMI CHAMPION… Tim Tebujang FC menggi gelar champion Mangkuk PIBG SK Mendas 2019 ngalahka 19 tim bukai.

“Kaul rat apai indai, bala pengajar, nembiak sekula enggau mensia mayuh ti datai nyukung aktiviti baka tu endang manah sereta patut dikemeran.

“Ari kaul rat tu mih sekula deka nyapai pemujur nengah aktiviti diatur begulai PIBG enggau komuniti menua tu nipakka juluk agenda pelajar menua kitai.

“Dikearap nengah pekit baka tu nyadi pelasar ngagai semua kitai kelebih agi sida ti bepekit nambahka peneleba enggau penau diri maju ba pengidup,” ku iya meransang.

Ngelansa pasal pekit sehari nya, tim Tebujang FC menggi gelar Champion Pekit Main Bol Mangkuk PIBG SK Mendas ngalahka tim Deplas FT, 1 – 0.

Tim Hermanos FC ba penuduk ketiga ngalahka tim Sam Con, 3 – 1, ba pekit renggat kepenudi kena Hari Satu tu tadi.

NGUJI BARU… Tim Deplas FT ba penuduk kedua.

Bisi 20 tim bepekit ke alai champion nerima perais mata duit RM1,000, trofi enggau midul, lumur dua nerima RM700, trofi enggau midul sereta lumur tiga nerima RM500, trofi enggau midul.

Tim ba penuduk keempat mega enda pulai enggau jari puang ke alai sida nerima perais sagu ati penyampau RM250.

Pekit diatur tiga hari berunggu nya mega richah enggau macham main bukai nyengkaum nyagam berapa pemerat bol ti nyendia perais kipas angin.

Chabut tikit benasit mega bisi diatur ti nyendiaka bemacham perais baka perais kereban elekterik enggau hamper.

AYAM MATA… Mangkuk PIBG SK Mendas ti diperebut 20 tim bepekit.