BECHUNTOKA orang ti udah maju ba pengawa dagang meransang Kennedy Edwin Ganai tauka tampak agi dikangau Kent muka sebuah palan pemerindang di menua Sibu.
Ku Kent, nama palan dagang nya diberi nama Masterjam Rock N Roll Music Cafe & Bistro.
“Palan dagang aku tu ditumbuh kena bulan Oktober 2022 ba Jalai Tun Ahmad Zaidi Adruce belakang Sepital Besai Sibu.
“Aku ngepunka pengawa dagang laban bechuanka orang ti udah dulu maju ba dagang baka Ray Kroc iya nya pemungkal McDonald’s.
“Pia mega aku bisi meda cherita McDonald’s ti dilakun Tom Hanks,” ku Kent nusui penumbuh dagang iya.
Terang Kent, iya milih nama Masterjam Rock N Roll Music Café & Bistro bepun ari dagang studio jamming dalam taun 2003.
“Bela besaup enggau aku muka palan tu iya nya menyadi aku Will sereta bakih aku Micheal Jengging,” ku Kent.
ASAM GARAM BEDAGANG
Tusui Kent, lebuh ngepun dagang nya mayuh amat penguji ti kala nekul tang iya meransang ati diri ngambi mujur nitih singkang orang bukai.
“Ukai pekara ke muntang deka ngulihka lisin bistro enggau pemerindang ungkup dagang baka enggi aku tu.
“Suah mega kena kompelin bekaul pemerindang enggau bistro tang diatu semua tu udah diatur manah,” terang Kent Ku iya, semua penguji tu ulih ditapi berindik ari peransang bala bakih enggau kaban belayan ti bela rindu ke pengawa dagang.
Ba cafe iya, Kent madahka mayuh bansa pemakai enggau ai irup ti chukup nyamai sereta enda ngelebu mensia mayuh.
Entara bansa pemakai disedia ba Masterjam Rock N Roll Music Café & Bistro baka panggang dagin, manuk enggau ke bukai ti patut ditapatka bala pengusung.
MAKAI SERAYA BEPERINDANG
Kelimpah ari nya, ba palan nya mega bala pengusung deka diperindang enggau raban penanyi ninting Hari Lima enggau Hari Enam.
“Kami mega ngambi raban pemerindang kitai ditu empu dikena merindang bala pengusung ke datai kitu.
“Pia mega, perengka muzik enggau sistem munyi sigi udah disedia lalu tau peda ba Facebook Masterjam Rock N Roll Music Café & Bistro,” ku Kent nyemetak.
Tampung Kent, palan dagang iya mega chukup strategik lalu rega ai irup enggau pemakai endang ulih ditangkup pengusung.
“Kelimpah ari nya, kami bisi nyendia endur ngatur pengerami baka ngintu hari pengada tauka pengerami bukai.
“Ninting ujung minggu, endang bisi program pemerindang begulai enggau penanyi sereta raban penanyi menua kitai,” ku Kent.
Naka diatu, Kent madahka timbal ari mensia mayuh chukup manah.
“Mayuh timbal positif diterima aku ari bala pengusung ke udah ngasaika servis sereta beperindang ba Masterjam Rock N Roll Music Café & Bistro ditu
“Ngarap jemah ila, majak mayuh agi orang ngusung Masterjam Rock N Roll Music Café & Bistro dikena merindang ati lalu nyepi penyamai pemakai ditu,” ku pengarap Kent.
Lebuh nyimpul randau, Kent ngarap semua kitai Dayak ti ngemeran pengawa dagang, anang takut nguji sereta ngeruh ai besemekih ba dunya dagang.
“Anang takut nguji lalu anang mantul ati ngereja pengawa dagang.
“Ba pengawa dagang, kitai meseti lurus ati ngagai bala penguna ngambi dagang semampai diberekat.
“Jalai sigi udah bisi dirandang, tulang aja ditanya ungkup kitai ngemansangka diri ba pengawa dagang,” ku Kent nyimpul randau.
