KOTA SAMARAHAN: Perintah Sarawak udah berunding enggau Universiti Malaysia Sarawak (Unimas) dalam pengawa numbuhka makmal betanam betupi di menua pesisir di nengeri tu.

Premier Sarawak Datuk Patinggi Tan Sri Abang Johari Tun Openg madahka, nengah penumbuh makmal nya Unimas ulih ngelatih peranak di menua pesisir kelebih agi nembiak rebak baru ba pengawa betanam betupi moden.

“Nitihka pansik aku maya ba bidang betanam betupi suba, pekara ti nekul iya nya pengelemi kitai ari sukut proses ti enda efisyen enggau ngasilka kualiti pemakai ti enda tinggi.

“Nya alai, aku ngasaika diatu awak ti engkeman endur kitai nguna chara digital dalam proses enggau industri betanam betupi, lalu industri tu enda ulih dikumbai industri ti lama,” ku iya.

Abang Johari bejaku munyi nya lebuh ditanya pemberita pengudah bejadika Pengerami Kovokesyen Komemoratif Unimas di Dewan Tunku Abdul Rahman Putra (DeTAR Putra) ditu kemari.

Ku iya, penumbuh makmal nya beguna laban industri betanam betupi moden ulih nyadi sebuah industri ti meri penatai pemisi ukai semina ngagai nengeri tang ngagai rayat empu.

“Diatu semua input udah bisi, tang penanggul diatu baka ni kitai ulih meransang orang bekebun enggau nembiak rebak baru ngemeranka pekara betanam betupi nyadi entiti dagang.

“Kebuah pia, laban Sarawak bisi tanah ti besai ti ulih dikemansangka ungkup tuju betanam betupi moden sereta ngasuh menua tu nyadi pengeksport pemakai,” ku iya.

Iya mega nerangka, runding ti ngumbai orang ti ngemeranka pengawa betanam betupi ngena tudung purun, megai changkul enggau mua ti lelak nya patut diubah.

“Nyema pekara tu agi dirunding kitai baka nya, nadai orang deka ngereja pengawa betanam betupi, tang enti kitai ngerunding orang nya nguna teknologi enggau ‘internet of things (IoT)’ udah tentu raban nembiak deka ngaga pengawa tu,” ku iya.