Malaysia entara menua ti mayuh orang gemu

KUCHING: Malaysia entara menua ti ngerikod pemadu mayuh orang gemu di dunya tauka ngembuan berat tubuh ngelui ari tikas ke patut.

Direktor Opis Pengerai Nengeri Dr Jamilah Hashim madah pekara tu nyadi ketegal daya idup rayat di menua tu ti kelalu siru enggau temuai kelimpah rindu ngidang pemakai ngagai temuai.

“Di Sarawak aku meratika peranak menua tu amat kemerah laban lebuh begusung pangan diri mija penuh endur mantaika pemakai bemacham bansa.

“Pia mega, empas pemansang pemakai kemaya hari baka ‘buble tea’ ti ngundan mayuh gula ngasuh utai diempa kitai nadai bepengerai ti tau ngujungka gemuk,” ku iya.

Jamilah bejaku munyi nya lebuh bejadi Program Skim Ngibuhka Pengerai Ungkup Raban B40 tauka Peka B40 ba Klinik Petrajaya ditu, kemari.

JAGA PENGERAI…Dr Jamilah Hashim ngelawa palan pengerai kemi manis ba Program Skim Ngibuhka Pengerai Ungkup Raban B40 tauka Peka B40 ba Klinik Petrajaya ditu, kemari.

Ku iya, rayat menua tu mega jarang mindah sereta kurang bepeluh tau ngujungka siku-siku orang gemu.

“Diatu mayuh amai cherita ayan ba televisyen ti manah baka drama enggau filem ti ngasuh kitai rindang sereta enda mindah.

“Lalu ditambah agi enggau utai pakai penuh mija ti ngasuh kitai makai pemakai enggau nadai betagang.

“Ba pansik Opis Pengerai tiap 100 iku orang ti bepenyakit, 18 iku ari sida nya ditepan penyakit kemi manis,” ku iya.

Jamilah madah, menua tu mega entara menua ti ngempu peranak menua pemadu gemu sereta pemadu berat di Asia empas ari gaya pengidup ti enda bepengerai.
“Tu ti ngujungka mayuh peranak menua berambi ubat enda ngetu di sepital enggau klinik.

“Nya alai, aku ngarapka kita sama bela beratika pekara tu sereta ngurangka pemakai ti ngundan mayuh gula.

“Anang enda ngaul diri dalam pekara lumba enggau main ngambika kitai seruran ngeluarka peluh sereta ulih ngurangka pengemu tubuh,” ku iya.