Malaysia mujur ngetanka rampa menua gadung

KUCHING: Sarawak nyadi nengeri pemadu besai ngempu kampung di Malaysia laban ngembuan 42 peratus kampung tauka 7.7 juta hektar di selampur menua.

Kepala Menteri Datuk Patinggi Abang Johari Tun Openg madahka ketegal pemesai kampung di Sarawak, ngujungka Malaysia ulih ditukuka nyadi menua ti ngetanka rampa menua gadung.

“Industri kayu ramu ba Sarawak bepun ba taun 1886 lalu nyadi pekara pemadu beguna ngagai pengerembai sosio-ekonomi menua nyentukka diatu.

“Peyampau kampung ti sekali tauka dua kali musin ngasuh kayu berega baka kapur, engkabang enggau kayu bukai majak kurang,” ku iya.

Abang Johari bejaku munyi nya rambau bejadika Program Ngintu Hari Kampung Sedunya Renggat Nengeri Sarawak 2021 di Taman Tasik Bukit Siol DBKU ditu, kemari.

Ku iya, dalam nyapai aspirasyen rayat enggau juluk nengeri maju ba taun 2030 pangka pemansang endang enda ulih diseliahka.

“Nya alai, udah datai maya kitai ngaga aktiviti enggau restorasyen kampung ngambika enda nanggul mensia mayuh besemak.

“Nengah Program Restorasyen Landskap perintah nengeri udah ngemendarka agih belanja RM62 juta nengah Langgur Pemansang Lumpar ke-12 (RMK12) ngagai Opis Kampung Sarawak (JHS).

“Kelimpah ari agih belanja tu, kitai mega dibantu raban koporat ngaga pengawa nanam pun kayu kelimpah ngemanahka kampung enggau landskap menua.

“Menua mega ngembuan juluk ati nanam 100 juta pun kayu nyerumba taun 2025, ke alai diatu kitai udah mujur nanam tiga juta pun kayu,” ku iya.

Iya mega madahka, Sarawak diatu nagit nanam urung sejuta hektar pun kayu komersial ti bemacham bansa ungkup pemansang industri kampung nyerumba taun 2025.

“Naka diatu, lebih ari 500 ribu hektar palan ti diagihka ungkup industri tu udah diatanam.

“Kitai ngarapka, dalam menua berumban nuju pemansang, perintah tetap enda ngelaungka pengawa ngintu rampa menua gadung,” ku iya.

Sama bisi datai Sapit Kepala Menteri ti mega Menteri Pemansang Mengeri enggau Pengeraja Asal Kedua Datuk Amar Awang Tengah Ali Hasan, Menteri Muda Pemansang Mengeri enggau Pengeraja Asal Datuk Haji Len Talif Salleh, Direktor JHS Datuk Hamden Mohammad enggau ke bukai.

Suara Sarawak