Malaysia – Singapore deka terus bekerjasama ba sektor kuasa enggau pengeraja asal

KUALA LUMPUR: Sapit Menteri Pengeluar Kuasa enggau Pengeraja Asal, Ali Biju nerima penemuai basa ari Sapit Konsulat Tinggi Singapore ke Malaysia, Loy Hui Chien, ditu tadi.

Lebuhka berandau, seduai bisi ngenang pasal kerejasama entara kededua menua ba sektor kuasa enggau pengawa ngintu pengeraja asal.

Kelimpah ari nya, Ali mega bisi berandauka pasal pengawa numbuhka Opis Dagsng enggau Dagang Temuai Sarawak – Singapore (Statos) di Singapore.

Iya mantaika pengandal opis nya ulih ngeranchakka agi pejalai sektor dagang bekaul entara kededua menua nengah pengawa begulai ti dipejalai.

Ba taun 2018, nilai dagang export Sarawak ke Singapore manggai RM1.2 billion seraya nilai import RM1.6 billion lalu agi tubah peluang makit apin diserungkai.

Ali ngena peluang nya mantaika isu pengelantang pengereja ari menua Malaysia di Singapore lebih agi raban bansa Dayak ari Sarawak.

Ku iya, pekara tu endang patut dikerandau ngambi pengelantang rayat Sarawak ke gawa din seruran diintu meruan bepelasarka sempekat pengaji enggau pengereja.

Nya alai Ali ngarapka kaul kerejasama entara kededua menua seruran tegap ari semua sukut ngambi pulaika pemaik enggau penguntung begulai.

Randau nya diatur ba Opis Menteri Pengeluar Kuasa enggau Pengeraja Asal (KeTSA) ditu nitihka Atur Pengawa Standard (SOP) baka udah ditetap.