Malaysia ulih baka selama lepas 31 Ogos enti rayat bedisiplin

KUCHING: Enti semua rayat menua tu ngemeranka disiplin, menua kitai ulih tama ngagai renggat normalisasyen (baka selama) pengudah 31 Ogos nyentukka vaksin ungkup penyakit tu ila ditemu, ku Tan Sri Muhyiddin Yassin.

Menteri Besai nya madah perintah nadai berunding mayuh deka bejalaika Atur Tagang Pejalai Diteritka Agi (PKPD) enti sema kes positif Covid-19 ba endur nya nambah sekumbang Atur Tagang Pejalai Penyuman (PKPP).

Ku iya, kenyau Atur Tagang Pejalai (PKPP) dipejalai kenyau tiga bulan ke udah, Perintah Besai udah bejalaika mayuh macham strategi enggau chara dikena nagang pengerekai igi penyakit nya.

“Perintah udah meri mayuh pengelunggar ngagai rayat enggau syarat rayat meseti ngembuan tanggungpengawa ti serius ngemeratka chara baru sereta nitihka Standard Atur Pengawa (SOP) ke udah ditetapka perintah.

“Nya alai aku minta raban ketuai komuniti nyengkaum ketuai genturung pendiau sereta ketuai gerempung ukai dikuasa perintah (NGO) ngambika seruran ngemeratka pengerekai igi penyakit Covid-18 sereta matau semua komuniti nitihka SOP ke udah ditetap” ku iya.

Muhyiddin madah munyi nya ba aum pemberita bekaul enggau PKPP di Putrajaya, tadi.

Kelimpah ari nya ku iya, raban pengaji meseti beraritka semua pengereja pengawa sida nitihka SOP ba endur gawa.

Ngelansa bekaul enggau PKPP, Muhyiddin minta rayat ba menua tu ngena aplikasyen MySejahtera ngambika rayat ulih ngatur pengerai diri empu.

“Aplikasyen tu tau mantu Opis Menteri Pengerai (KKM) berumban ngatur pengawa sida nyidi sereta ngiga kaul semak enti sema bisi kes berampit Covid-19 nyadi ba komuniti menua tu,” ku iya.