Manah agi PSB ba luar GPS – Soon Koh

SRI AMAN: Peneka bediri minta pilih ba mayuh penuduk ungkup Pengawa Bepilih Besai Nengeri deka datai entara siti ari kebuah Presiden Parti Sarawak Bersatu (PSB), Datuk Sri Wong Soon Koh ngemaduka diri nyadi menteri.

Iya mansutka pekara nya rambau ngulu Pengerami Ngiling Bidai Gawai diatur PSB Pampang Simanggang ba Dewan Suarah Sri Aman ditu, malam ensana.

Kenu ku ex- Menteri Wang Kedua nya, nyema PSB masuk Gabungan Parti Sarawak (GPS), sida nyau berebut penuduk enggau Parti Bersatu Rakyat Sarawak (SUPP).

“Nya alai, manah agi kami ba luar GPS laban kami peneka nentuka pemayuh penuduk endur bediri minta pilih.

“Tambah mega kami peneka ngaga pemutus lalu pekara tu udah dipadah aku ngagai Kepala Menteri, Datuk Patinggi Abang Johari Tun Openg maya betemu kena Hari Empat minggu ke udah,” ku iya.

Iya mega madah Kepala Menteri deka meda rayat Sarawak ti nentuka pengari sida sereta parti ni ke bebdnar gawa ke sida.

“PSB endang parti anak Sarawak ti bebendar ngatur pemansang ba menua pesisir.

“Kitai deka gawa ungkup semua rayat nadai ngira bansa, pengarap enggau adat lebih agi komuniti Dayak,” ku iya.

Tandu iya, sebedau tu UPP semina bejalaika pengawa ba mengeri, pengudah diubah nama baru nyadi PSB, parti tu deka bebendar gawa ke rayat ba menua pesisir.

Iya mega meransang semua kaban parti ngaga pansik baka ni BN tau alah ba pengawa bepilih besai ke udah lalu berunding chara matak baru sukung rayat ngagai PSB.

Wong Soon Koh

Suara Sarawak