Mansai pengawa lepa di rumah panjai

KALA enggau orang mansai nuan? Sekeda ari tanya tu suah didinga lebuh anak mengeri bisi rembus pulaika rumah panjai kelebih agi musin kemisi panjai ujung taun nyerumba hari besai enggau kemisi sekula.

Nama bagi pengawa dikumbai orang mansai tu kini. Pelaba aku mayuh rebak baru enda nemu baka ni gaya pengawa dikumbai mansai sereta kereban ke dikena.

Serak tu Suara Sarawak mai kitai ngenang sentang pengawa dikumbai mansai ti suah dikereja sida ke diau di rumah panjai maya lepa ari pengawa bumai.

Sekeda orang nurun mansai ketegal rindu ati bebakih enggau diri serumah kelebih agi sida ke baru angkat bujang dara nyengulai sida ke tuai agi umur.

Agi mit suba, enti disebutka pengawa bemain di ai baka mansai, nubai, nyala, nyelambau, ngempang, nyagam, nangguk, minto enggau mukat sereta macham bansa pengawa bekaul ke bukai, sigi gagit endar ati.

REJEKI… Pupu bansa ikan, gerama enggau anak seni diulih lebuhka mansai.

Pengawa mansai tu endang ngasuh ati rindu laban meda asil ke diulih, rindang bebakih lebuhka di ai kelimpah ulih matah sekeda bulu babas kelauk ti kena pansa.

Entara bulu babas suah dipatah ngerampas lebuhka mansai baka kantuk ngemalung tauka sekeda menua ngumbai daun sabung kekura, daun letup enggau ke bukai.

Suah mega lebuh mansai, enti bidik tetemuka buah empit, buah kundung enggau bansa buah kampung ke bukai ti rarat ari ulu dibai arus sungai enti sema datai ba taun buah kampung mansau.

Ngelansa silik pasal pengawa mansai, kereban suah dikena orang iya nya pemansai ti dianyam enggau dibingkai ari wi lalu pemesai nitihka orang ti ngena iya, nyamai dibai.

Enda tinggal mega sida bebaika raga, tabir, sadak enggau sebarang utai ulih dikena bemain di ai ti rumpas dibai sereta beguna.

Maya ti manah endur nurun mansai iya nya musin kemarau, lebuh ai ba anak sungai pabu, kira tengan punggung orang besai tuai lalu jam nurun bemain di ai nitihka pengelantang diri empu.

Utai ke dipansai endang nadai dipilih, semua diraup magang. Baikka nya anak ikan empelasi, anak seni, anak memuri, enseluai enggau bansa ikan sungai ke besai baka baung, semilang, undang nyengkaum pama diambi magang.

Belebuh mega apus hari endur mansai enti sema ai ngena lalu ikan enggau undang dipeda nyaru lalu penyampau tubuh orang ke enggau mansai endang nadai ditatak, mit besai, tuai biak endang dibai sampal nurun.

Enti aum orang ke nguluka pengawa apus hari, dia sida endang bebaika bekal baka tungkus asi, garam enggau utai dikena ngintu diri di tanah.

Perengka berapi mega nadai entu beleman, lempis ngena daun buan, lulun, pais tauka semina ditunu atas daun api, sigi manis magang utai pakai maya nya.

Hari mega enda berasai nyau dataika lemai, anang agi enti beumba enggau bala mayuh sigi rindang diri diau di tanah laban sama bela rindu ngeruh ai, nyagam utai sebelah teluk enggau lubang tanah tauka ba batang kayu repuk dalam ai, ngusak daun babas sebelah tebing ngambika anak ikan tauka undang belalai dia pansut magang tama pemansai.

Pengawa mansai maya kemarau tu chukup ngasuh ati kekesit deka pulai ke menua, lelenggauka sendi menyadi, aya ibuk enggau aki ini sereta bala bakih kelebih agi sida ke serambau.

Nya alai, anang muai peluang enti sema bisi awak tauka kemisi dikena pulai ke menua seraya ngabas kaban belayan enggau diri serumah kelimpah ulih ngempitka agi tanggam kaul ti udah retai.

Mansai tu nyadi sebagi ari pengawa dikemeran aki ini kitai menya begigaka pemakai sebelah ai, ngujika nasip siku-siku, pemidik nya bepanggai ba pengeregas enggau pemintar runding beridup di tanah.

Suara Sarawak