SRI AMAN: Raban nembiak ba Sri Aman diperansang ngulu kus pandak ngambi belajar pengelandik baru.
Ba pekara nya, raban Palan Pemansang Pengelandik Sarawak (PPKS) Sri Aman benung chakah ngatur aktiviti promosyen nagit nembiak tauka penyereta ari sitak rumah panjai enggau genturung pendiau di menua pesisir.
Empai lama, Sapit Menteri Pelajar, Inovasyen enggau Pemansang Bakat Sarawak, Datuk Francis Harden Hollis udah ngabas seraya gawa ngagai taba PPKS ba Pasar Simanggang.
Iya disempulang raban Ejensi Pemansang Sri Aman (SADA) ngambi mendingka penerang pandak ari raban konsultan pasal status projek nya ti udah tembu 68 peratus lalu tumu ari taga asal.
Projek PPKS nya disadang tembu penuh 28 Oktober 2023 lalu deka belabuh beoperasyen taun baru.
Pengudah tembu ila, PPKS Sri Aman deka meri peluang ngagai nembiak ba Sri Aman sereta sitak besemak belajar kus pandak ba bemacham pekara.
Nya nyengkaum fertigasyen, Microsoft Word enggau Excel, Teknik Filem Nutrien (NFT) hidroponik, pengawa ladang sawit, Microsoft Powerpoint enggau pengelandik komunikasyen, wiring, miki komputer, akuaponik enggau nanam kulat.
Sama datai Chairperson SADA, Datuk Seri Rohani Abdul Karim, Sapit Chairman SADA, Datuk Amar Jaul Samion enggau Pegawai Khas SADA, Datuk Indit Bangai. – EDISI UKAS
