ARTIKEL

NADAI ENDUR MANTAH… Maryline temegah ulih bediri atas panggau mantaika pekayan asal Bidayuh Singai.

Maryline Dyna rindu belajar budaya bansa bukai

Facebook
Twitter
LinkedIn
WhatsApp
Telegram

JOM BACA E-PAPER SUARA SARAWAK/ NEW SARAWAK TRIBUNE PERCUMA SEAWAL 2 PAGI SETIAP HARI. KLIK SINI

TAJA Pekit Ratu Etnik Piala Justin Williamson Bridal & Studio udah tembu, tang pengingat enggau kenang manis meruan dikeingat Dara Sibu, Maryline Dyna.

Dara bajik nya muka randau, pekit Kumang tu nyadi pelasar belajar adat enggau main asal bansa bukai kelimpah mekuh adat enggau main asal bansa diri empu.

Ba Maryline, pekit tu mega manah endar diatur dikena matak mayuh agi rebak biak bisi pengangkun belajar bemacham seling penemu ari sukut adat enggau main asal.

“Rebak biak diperansang bisi pengangkun ngagai adat enggau main asal diri empu sereta nambah penemu diri belajar adat enggau main asal bansa bukai.

“Ari nya tadi, basa kitai ngagai adat enggau main asal bansa bukai deka majak ditegi enggau diangkat.

“Adat enggau main asal nya meh nyadi identiti teguh ngambi meruan ditampung ari rebak diatu ngagai rebak dudi.

“Ba jeman dunya deras mansang, adat enggau main asal pupu bansa di Sarawak majak dikelala dunya nandaka komuniti bukai pen rindu meda pemanah pekayan asal, main asal enggau daya idup kitai,” ku iya.

SELING PENEMU

Dara tampun puji ti ngaku rindu meda personaliti Kimi Tomas nya madah, sepanjai pekit nya diatur, iya mayuh belajar budaya bansa bukai ari sukut pemakai asal bansa Bidayuh, Orang Ulu enggau Iban.

Ba dia, iya madahka diri belajar genap perengka pekayan asal Bidayuh ti dikena iya maya malam final Ratu Etnik Piala Justin Williamson Bridal & Studio.

“Nyau ngenang singkang pengidup diri ba dunya pemajik gamal tu, abis sekula Pom Lima tudah aku lalu nguji masuk pengawa model enggau pekit Kumang.

“Ba dia, aku nguji bepekit seraya ngiga penemu senentang adat enggau main asal kitai Iban.

“Berasai temegah ulih bediri ba atas panggau dipeda bala mayuh bekenaka ngepan kitai Iban.

“Ba Pekit Ratu Etnik Piala Justin Williamson Bridal & Studio empai lama, aku ngena pekayan asal Bidayuh Singai ari Bau.

“Aku nerang mimit nengah pekayan asal tu, ba atas pala nya disebut sapiah lalu skirt disebut jomuh, marik empang disebut pangiah sereta tali sementing disebut porik,” ku iya nerang.

Maryline, 21, madah, rebak biak patut ngena manah bemacham pelasar disedia belajar adat enggau main asal kitai Iban baka beganu, bepantun enggau bejawang.

Ku iya, main asal kitai Iban tu endang ari kelia ngambi sida rindu belajar ari orang ti ngembuan dalam penemu senentang main asal.

Ukai naka nya aja, iya nyemetak madah, rebak biak meseti nyikap diri ngena penemu senentang genap pekayan asal dikembuan etnik ba Sarawak.

“Kitai chukup betuah diada ba Tanah Kenyalang, penemu ke bisi tu ulih dibai maya bepekit ba menua bukai ila seraya mai budaya asal kitai ba panggau dunya,” ku iya tuchum.

Ke rikod, Maryline kala bulih bemacham gelar baka 1st Runner up Ratu Kebaya Durin 2022, 1st Runner up Kumang Kanowit 2023, Finalist Kumang Perpaduan 2023, Finalist Kumang BCF 2023 enggau 2nd runner up Kumang Selangau 2023.

Pia mega, iya kala bulih gelar Selinggar Matahari Main Asal Iban Pekit Kumang Keling Karnival Selangau 2023, Top 6 Raban Ngepan Iban 2023, Kumang Pemadu Mentas Raban Ngepan Iban 2023, Top 5 Pekit Kumang Pesta Lada Julau 2023 enggau pemadu baru nya, Top 5 Ratu Etnik Piala Justin Williamson Bridal & Studio.

NERANG… Maryline nerang senentang pekayan asal Bidayuh Singai dikena iya.
BULIH GELAR… Maryline enda pulai jari puang pengudah bulih Top 5 Ratu Etnik Piala Justin Williamson Bridal & Studio.

BERITA LAIN

Dua pendam lama di Song disengkubang

SONG: Dua pendam Iban ditu udah disengkubang orang nadai tanggungpengawa ba penusah diripot nyadi kena 20 enggau 22 Mei tu tadi. Tuai Polis Pelilih Song,

Kaul komuniti Dayak meruan teguh

LUNDU: Penyerakup komuniti Dayak diatu chukup teguh taja ari bemacham raban etnik, ku Sapit Premier, Datuk Amar Douglas Uggah Embas. Iya ti temegah beratika pekara

BERITA TERBARU