Masing mantu peranak Long Singut ngaga tingki

KUCHING: Sapit Kepala Menteri Tan Sri James Jemut Masing irau meda tebal agi peranak Long Singut nadai dokumen pengelala diri nyadi rayat Malaysia.

Ku iya, nyau deka setengah ari 729 iku peranak dia apin bisi tingki ke alai sida nya rebak kedua enggau ketiga nguan menua nya.

“Aki ini tauka peturun sida tu suba mindah kitu ari menua Kalimantan din dalam pun taun 1960-an.

“Nya kebuah aku naka ulih mantu peranak dia ngulihka dokumen pengelala diri baka tingki enggau surat beranak ngambi sida bisi hak baka rayat bukai.

“Aku minta perintah mutarka penanggul rayat nadai tingki ba menua tu enggau jampat.

“Opis Pengerejister Bansa (JPN) Sarawak mega patut nganjung raban sida ngagai Long Singut ngambi ngaduka pengawa nitih pematut.

“Enti kitai kelalu lumbu mutarka penanggul tu, orang deka ngumbai kitai nadai ibuhka penusah ditapi rayat,” ku iya.

Suara Sarawak