Masterpiece malas penyiru bala peminat

KUCHING: Tu kelai terima kasih nuju bala peminat Masterpice ke udah ngaga cover lagu kami, pia ku Depha Masterpiece ngelansa pasal Anugerah Lagu Cover Pemadu Manah.

Ku Depha, anugerah nya mega ngenang pemanah enggau sukung sida ke udah kiruh cover lagu disadaka raban sida.

Taja pia ku Depha, tu enda nyengkaum sida ke udah lama ngadu cover lagu ari raban Masterpiece suba laban naka diatu, sida semina ulih milih empat iku nya dulu.

“Enti dikira ari suba, sigi mayuh sida ke udah cover lagu kami lalu chukup manah didinga nitihka patah nyawa sida empu sereta dikerindu bala bukai.

“Ukai semina ari sukut patah nyawa (vocal) tang nyengkaum gaya muzik, video enggau gaya sida mai diri ba media rama lalu utai pemadu beguna nya sida berupai ulih nyingkang jauh agi ba pengawa belagu tu.

KELAI TERIMA KASIH… Bisi empat iku ti deka nerima Anugerah Cover Lagu Pemadu Manah ari raban Masterpiece.

“Anugerah tu kelai kami berasai temegah sereta gaga laban mayuh bala peminat udah nyadaka lagu kami taja lagu nya baru dipansut,” ku Depha tuchum manis.

NYADI PERANSANG

Nambahka nya ku Depha, anugerah tu mega dikena meri peransang ngagai semua bala peminat kami sereta sida ke rinduka lagu Iban lalu ngaduka cover pemadu manah.

Iya mega madahka tu ukai semina meransang bala peminat ngaga cover lagu sida aja tang mega lagu Iban ke bukai kelai nyukung industri muzik Dayak.

Ku Depha, kadang kitai kelalu kiruhka pemujur diri nyentuk enda ingatka sida ke udah nyukung kitai ngelama tu.

Ambika banding ku iya, sida ke udah cover lagu tu kelimpah ari lagu asal nya empu lalu sida tu mih ke udah nyukung pejalai bala penanyi ngelama tu dataika lagu nya tebilang.

Nya kebuah, Depha madahka kitai enda tau enda beratika pekara baka tu nadai ngira nya pengawa ti mit tauka besai.

Depha madahka sida ke cover lagu tu nya mih ngasuh lagu bala penanyi majak dikelala nitihka patah nyawa sida empu ngambi lagu nya ngembuan bebida tiun nitihka kreativiti sida empu.

“Kreativiti nya ke narit perati bala bukai ngujungka video sida ke cover lagu nya dipeda bala bukai enggau mayuh dikunsi bala bukai sebelah media rama kelebih agi Facebook.

Lydia@Lydbie

“Berasai gaga lebuh meda mayuh orang cover lagu kami tu (Masterpiece) tu.

“Kebuah pia ba penemu aku, pengawa baka tu endang manah dikereja ngambi nyadi teladan ngagai rebak diatu.

“Diatu, mayuh pelasar kitai mantaika pengelandik belagu baka mantaika video cover lagu nengah Facebook, Youtube, WeSing enggau pelasar digital ke bukai.

“Sida ke cover lagu kitai nya mai reti sida rinduka lagu kitai enggau deka ngujika patah nyawa sida mai lagu kitai nitihka kreativiti sida empu.

“Aku endang nyukung pengawa tu ngambi industri muzik Iban majak angkat sebaka enggau industri muzik ke bukai.

“Laban ba penemu aku, pengawa bakatu chukup manah lalu tau nyadika teladan enggau peransang bala anak biak jeman diatu,” terang Depha.

SIRUKA PEMINAT

Dayana Shini

Depha mega madahka empat iku ti diberi anugerah nya mega enda ngadang laban raban Masterpiece empu chukup siruka bala peminat iya ke udah nyukung ngelama tu.

Iya mega madahka anugerah tu ngenang semua pengiruh sida ke sanggup nyendiaka diri belagu kelebih agi lebuh nyendiaka perengka studio.

Nangkan nya ku Depha, iya empu endang rindu mansik penau baru ti jarang ditemu bala mayuh lalu lebuh ngasaika sida nya ulih nyingkang jauh, iya pen bekunsika cover sida ba Facebook.

“Ari pengawa cover lagu nya tadi, sida deka dikelala bala mayuh lalu video nya dikunsi bala mayuh dataika sida ayan sebelah media rama enggau bisi peminat kediri empu diatu.

“Genap sida ke diberi anugerah tu ngembuan pengelandik sereta patah nyawa ke bebida lalu sama mega ari sukut kreativiti sida mai lagu Redak Seribu nya,” ku Depha nerang pasal empat iku orang ti udah cover lagu Redak Seribu.

Depha ngarapka Lydia@Lydbie, Dayana Shini, Iz Azman enggau Eva V David majak tampak rita meruan perenching baka tekang gemala ba genap pengawa dikereja sida.

Kelimpah ari nya, Depha mega meri besai terima kasih ngagai bala bukai ti udah cover lagu sida.

Naka diatu, lagu Redak Seribu udah dipeda lebih 5.4 juta ba Youtube Channel Depha Masterpiece enggau nerima 2,399 timbal ari bala peminat iya.

Iz Azman

 

Eva V David

Suara Sarawak