LUBOK ANTU: Penumbuh Gerempung Tang Soo Do (TSD) Lubok Antu nerima timbal ti manah ari apai indai enggau nembiak sekula peranak menua nya.
“Gerempung TSD tu berengkah dibuka pun bulan Disember 2021 tu tadi.
Naka tu, bisi 30 iku nembiak udah ngeregister diri masuk gerempung tu,” pia ku Sapit Presiden Gerempung TSD Kuching ke mega Sapit Presiden Gerempung TSD Menua Sarawak, Ricky Sim.
“Apai indai nembiak sigi meransang bala anak sida masuk gerempung tu laban sida nemu empas pemanah ari latih TSD tu ngagai pengidup anak sida,” ku Ricky.
Kenu ku iya, pemanah belatih TSD tu ukai semina ngajar nembiak pengelandik ngetanka diri empu aja tang mega ngajar sida ngambika lebih bedisiplin, nambahka pemerani ngagai diri empu, nempa pengering enggau pengeregas runding, lebih meretika utai ngelingi sida sereta ulih nagang nembiak kelalu rindang bemain telepon binching besehari-sehari.
Berebak enggau nya, siku nembiak ti enggau latih nya, Maryline Menai madahka diri berasai gaga ati laban ari latih TSD tu ulih ngangkatka pengandal iya ngagai diri empu sereta enda irau ati lebuh bejalai kediri laban bisi sekil ngentanka diri nyema diserang orang ti enda manah ulah.
Siku agi nembiak ti sempat dirandau pengari berita iya nya Ruby, iya madahka diri berasai lebih cergas, lebih bedisplin, tubuh pan berasai lempung pengudah enggau latih TSD tu.
Belalauka penerang ari iya, ninting taun sida mega bisi deka ngatur pekit TSD ba renggat pelilih menua Kuching, menua Sarawak, nasional enggau ba renggat dunya. Nengah TSD tu ulih nempa peluang ti tampak ngagai nembiak kena ngemansangka ba pengawa lumba enggau main.
“Latih tu dipejalaika ba Dewan Pemancha Chua Teng Yew Lubok Antu ninting Hari Enam enggau Hari Dua tauka Hari Tiga berengkah pukul 7 lmalam nyentuk 8.45 malam.
“Penyampau bayar ninting bulan masuk gerempung tu iya nya RM15 ngagai nembiak sekula lalu RM30 ngagai orang besai tuai,” kenu ku penerang iya.
Kenu ku iya, iya kala ngajar TSD berengkah ari taun 1987 sebedau iya mindah ngajar TSD ba Kuching. Ketegal pengerekai igi penyakit Covid-19, pengawa tu enda ulih dipejalaika. Dia iya lalu ngepun ke baru TSD tu ba Lubok Antu.
Iya ngarapka penyakit Covid-19 jampat ngetu ngambika TSD tu ulih dipejalaika baka selama sereta ngajihka mayuh agi bala nembiak sekula masuk Persatuan TSD tu.
Penerang silik pasal TSD tauka bisi ati deka masuk gerempung tu ulih betanya terus ngagai iya ba lumur telepon 019-8485865.
