KUCHING: Perintah Sarawak deka ngambi saham MASwings Sdn Bhd lalu ngambi servis langit menua pesisir ba kandang menua ulu Sarawak enggau Sabah.
Premier Sarawak Datuk Patinggi Tan Sri Abang Johari Tun Openg madah ke pekara nya benung diperunding enggau Malaysia Aviation Group (MAG) enggau Khazanah Nasional Berhad berindik ari jaku Perintah Besai minta Sarawak ngambi serikat penerebai nya.
Nerang lenak agi, iya madah ke Perintah Sarawak udah netapka dua atur peminta iya nya MASwings mesti nadai utang enggau muka pejalai ukai semina ngagai pejalai domestik iya nya Sarawak enggau Sabah aja tang mega pejalai serantau.
“Kitai deka ngambi saham MASwings lalu enda meda untung ke diulih aja tang kitai begunaka servis,” ku iya.
Abang Johari bejaku munyi nya lebuh dirandau pengudah ngemata pengawa nyain Sempekat Pemereti Ati (MoU) Ngambi Servis Langit Menua Pesisir ari Perintah Sarawak ba sebuah hotel tebilang ditu, kemari.
MoU nya disain Tuai Sekretari Opis Menteri Pengangkut Malaysia, Datuk Jana Santhiran Muniayan enggau Sekretari Mendam Opis Menteri Pengangkut Sarawak, Datuk Ir. Alice Jawan Empaling.
Sama datai dua Sapit Premier, Datuk Amar Awang Tengah Ali Hasan enggau Datuk Seri Dr Sim Kui Hian, Menteri Pengangkut Malaysia Loke Siew Fook enggau Menteri Pengangkut Sarawak Dato Sri Lee Kim Shin.
Iya nyemetak madah ke tuju Perintah Sarawak ngambi serikat penerebai nya endang deka negapka rega tambang kelebih agi entara Sarawak enggau Semenanjung sereta Sabah.
