Matang, Tabuan enggau Bekenu tiga sitak mesti dipunas ari dadah

SERIAN: Tiga sitak ba dua bagi menua tu deka nyadi fokus besai munaska isu dadah manggai taun 2025.

Direktor Ejensi Anti Dadah Nasional (AADK), Wan Madihi Wan Salleh madahka tiga sitak tu iya nya Matang enggau Tabuan di Kuching sereta Bekenu di Miri.

“Tiga sitak nya dikategori sitak gadung dadah laban bemacham program meri penyedar dipejalai.

“Program nya nipakka visyen munaska isu dadah manggai taun 2025,” terang Wan Madihi.

Wan Madihi mansutka jaku nya rambau aum pemberita pengudah bejadika Pengawa Nutup Hari Anti Dadah Nasional Ke-38 Renggat Nengeri Sarawak ba sebuah hotel tebilang, ditu kemari.

Ku iya, Sarawak bisi tujuh palan ditemu suah ngerikod kes dadah baka di Bagi Menua Kuching, Samarahan enggau Miri.

Ngelansa pasal sitak Serian nyadi palan angat ngidar dadah, Wan Madihi madahka ukai Serian aja dikelala nyadi palan angat.

“Enti nitihka statistik naka diatu, bisi 161 iku Orang Kena Patau (OKP) di Serian.

“Tu nyengkaum 19 iku dijil di baruh Seksyen 38B, 79 iku diukum di baruh Seksyen 38 B enggau 24 iku dipasuk ngagai palan mulaika pemanah ulah enggau siku volunteer deka masuk ba palan mulaika pemanah ulah,” terang iya.
Nangkan nya, Wan Mahidi madahka kes positif dadah nambah dibanding taun sebedau tu.

“Ba taun 2020, bisi 1,186 kes positif dadah seraya ba bulan Januari tu tadi, bisi 73 iku udah dikategori positif dadah.
“Penyampau kes nya semina dirikod ba pun taun,”ku iya.

Suara Sarawak