Matematik subjek entarabansa

Iya sebengkah subjek ti ngangkatka bidang sains enggau teknologi

SIBU: Sapit Pemesai Opis Pelajar Peilih Sibu Sim Peck Huat madahka subjek Matematik tu sebengkah subjek entarabansa ti ngangkatka bidang sains enggau teknologi.

Enti nadai subjek tu, utai ke digaga tauka ditengkebang ungkup sains enggau teknologi tusah digaga enti nadai pengelandik ba subjek matematik.

“Dunya diatu chukup begunaka ubah ba sains enggau teknologi tang nya begunaka matematik dikena ngepunka iya,” ku iya.

Iya madah munyi nya rambau bejadika Pengawa Nutup Bengkel Teknik Peresa Matematik SPM ditu, ensanus.

JENUH…Entara bala nembiak ke bisi datai ngulu program nya.

Bela diatur beserimbai enggau bengkel tu iya nya Pekit Kuiz Matematik Entara Sekula.

Bengkel tu diatur Methodist Pilley Institute (MPI) enggau Gerempung Akauntan Ke Diaku (ACCA) Malaysia.

Urung 430 pelajar ari 20 buah sekula sekondari ari kandang menua Sibu nyengkaum Bintangor ke bisi nyereta bengkel pengelama sepanjai hari nya.

Sama datai Menijar Kanan Pemansang Dagang ACCA Malaysia Ivan Tan, Ketuai Pemesai Eksekutif MPI Hii King Kai enggau pengelicha bengkel Tan Beng Puai.

Sim mega madah subjek nya dikena semua orang ninting jam dalam pengidup sida.

“Subjek tu besangkut paut enggau ekonomi, ubat, sains, wang, teknologi, utai ti ngelinggi nyengkaum sesebengkah polisi.

“Kelimpah nya, iya mega bisi kaul enggau utai idup nyengkaum pemati.

“Nya alai, matematik bisi ba sebarang endur enda ngira sapa lalu iya diaku ba dunya laban mayuh guna,” ku tandu iya.

Berebak enggau nya, Sim mega temegah enggau inisiatif digaga MPI enggau ACCA ti udah ngatur bengkel nya laban meri penau ngagai nembiak landik agi ba subjek nya.

ku iya, bengkel tu mega tau meri pangka ngagai subjek Prinsip Akaun ti bela nguna matematik enggau pekara ditemu ari bengkel nya.

Iya mega andal nengah kerejasama MPI, ACCA enggau Opis Pelajar Pelilih (PPD) Sibu dudi hari ulih ngerembaika agi bengkel tu.