JULAU: Sepenyampau 196 pala tanah Seksyen 18 udah disua ngagai pengempu tanah ba sebengkah pengawa diatur ba Rumah Kiroh, Rantau Limau, ditu tadi.

Sapit Kepala Menteri Datuk Amar Awang Tengah Ali Hasan madah, naka 31 Mei taun tu, 2.18 juta ekar tauka 884,899 hektar udah disukat.

Pengawa tu dipejalai di baruh inisiatif baru Nyukat Kelingi Tanah Adat Bansa Asal (NCR).

“Pia mega ba lot kediri, sepenyampau 26,765 lot nyengkaum 33,288 hektar udah disukat,” ku Awang Tengah.

Teks jaku iya dibacha Menteri Muda Industri enggau Beranakka Puku, Malcolm Mussen Lamoh ti ngarika iya.

Iya mega meransang sida bempu tanah ti udah nerima pala tanah patut berimbaka tanah nya ngambi mansutka asil.

“Anang lembau tauka enggai berimba ba tanah ngambika ulih mansutka asil lalu meri penguntung ngagai kitai kelimpah ulih ngangkatka tikas idup enggau nyungkak ekonomi,” ku iya nampung.

Malcolm mega dipebasa ngarika Awang Tengah ba pengawa nyuaka pala tanah nya.

Sama datai Menteri Muda Pemansang Dagang Mit enggau Jelan Pemesai (PKS) Datuk Naroden Majais enggau Adun Meluan Roland Duat.