Mayuh hak Sarawak lenyau, sebilik enggau BN

BAU: Gempung Parti Sarawak (GPS) endang ditumbuh dikena nyaga pengelantang pendiau rayat Sarawak laban sekumbang sebilik enggau BN suba mayuh hak nengeri tu lenyau.

Kepala Menteri Datuk Patinggi Abang Johari Tun Openg madahka pemutus numbuhka GPS endang beduduk ari Perintah Besai ti dipegai Barisan Nasional (BN) alah dalam Pengawa Bepilih Besai ke-14 nyin kemari.

“Kitai lalu berandau enggau parti komponen di Sarawak baka Parti Se’ati Rayat Sarawak (SUPP), Parti Rakyat Sarawak (PRS), Parti Pesaka Bumiputera Bersatu Sarawak (PBB) enggau Parti Demokratik Progresif Sarawak (PDP).

“Asil ari randau, dia kami teulihka pemutus udah datai ba maya kami patut keluar ari BN lalu bediri kediri empu megai Perintah Sarawak, laban pemadu berat ba kami semina ngemansangka nengeri tu empu.

“Tu ketegal semina orang Sarawak aja ti ulih nyaga Sarawak,” ku iya lebuh bejaku maya Pengerami ‘Pemimpin Bersama Rakyat’ di Padang Bazaar Krokong ditu, pagi tadi.

Suara Sarawak