Mayuh inisiatif mantu orang bumai ke agi biak

BETONG: Perintah Sarawak ngembuan politik ke nyemetak mantu raban nembiak lebih agi raban orang bumai biak nyengkaum (orang tuai) nengah chara baru ba pengawa betanam betupi moden.

Kepala Menteri Datuk Patinggi Abang Johari Tun Openg meransang sida ke agi biak tu chakah agi ngangkatka pengawa tauka asil.

“Nya alai, kitai meseti ngemeratka pekara pelajar laban kita bisi penau nambahka penatai pemisi nengeri nengah teknologi.

“Aku minta enti ulih diatu meseti belajar amat pasal teknogi ngemansutka asil betanam betupi.

“Aku andal orang biak ulih ngereja pengawa tu laban kitai bisi nyendiaka kus bepelasarka teknologi. Aku bisi juluk deka ngubah ekonomi ngagai digital lalu semua tu begunaka teknologi,” ku iya.

Iya madah munyi nya rambau sesi townhall ‘Berambeh Ngan CM Abang Jo’ dikemujurka moderator Chairman Nembiak GPS ke mega Adun Layar Gerald Rentap Jabu berimbai enggau Karnival Today for Tomorrow (T4T) renggat bagi Menua Betong di Dewan Sukan Tan Sri Datuk Amar Stephen Kalong Ningkan ditu, kemari.

Nangkan nya, Perintah Sarawak ngembuan mayuh inisiatif dikena mantu raban orang biak.

“Sebedau tu Perintah Sarawak meri latih nengah Ruai Pedagang (entara Perintah Sarawak enggau Perintah besai dulu suba) ba renggat perintah besai, nyadi program nya dikinsil sereta nadai agih belanja. Tang kitai ngambi lalu neruska pengawa nya ngena belanjar ari Perintah Sarawak.

“Pia mega bisi sekeda palan udah dilkelala endur kitai numbuhka Ruai Pedagang nyengkaum Betong.

“Kelimpah nya, nengah Bajet 2020 Perintah Sarawak bisi nyendiaka RM30 juta ngagai pedagang biak enggau jelan pemesai nengah atur mikro kredit. Perintah kitai bekerejasama enggau Bank Agro di menua pesisir.

“Entara pekara bukai kitai bisi ‘facilitation fund’ iya nya belanja dikena mantu raban orang bumai ke deka ngemansangka kebun sida nengah chara teknologi nyengkaum meri latih dikena ngemansutka asil betanam betupi,” ku iya.

Abang Johari nyelinting dalam kandang lima taun Sarawak deka bisi arus penyambung 5G.

Suara Sarawak