KUCHING: Urung 28 iku pemeli rumah di Taman Sri Kenyalang, Matang ditu udah leju ninga bemacham kedalih dibantai raban kunteritor pengudah rumah ke dibeli sida kenyau ari taun 2016 lalu enda nemu tembu.
Semua pemeli tu nyau nadai ulih nyabar diri laban kelalu asa meda rumah ke dibeli sida nadai sebarang kelai tembu tauka diberi kunchi.
Enti nitihka sempekat tumu iya nya Sempekat Jual Beli Rumah (SNP), projek nya disadang tgembu 2018 nyentuk 2020, tang nyentuk sehari tu nadai berita ari raban ke ngempu tanggungpengawa pasal status projek nya ke diperati ‘nadai ditegu’ kenyau beberapa bulan ke udah.
Pengari ari 28 iku orang ke ngempu rumah tu, Mohd Yusman Mohd Yusof, 42 taun madah nyema nitihka SNP, nya udah ngelui dua taun.
“Kunteriktor mayuh amat kedalih ari bulan siti ke bulan siti iya nya madah rumah deka tembu enda lama agi.
“Tang nyentuk sehari tu, nadai bekau digaga raban kunteriktor,” ku iya maya dirandau, kemari.
Asil ari perati ku Yusman, kebuah besai kunteriktor enggau nyuaka kunchi ngagai pemeli rumah ketegal bedau tembu abis.
Pia mega, permit diau (OP) bedau disua, jalai agi bedau ditar, karan nadai, pendiau rumah nyau rusak sereta nadai dikemanah.
Kenu ku Yusman, rumah malai ke dibeli tu diteju pia aja taja mayuh pemeli bebayar nengah chara putung gaji kenyau dua taun ke udah.
Ku iya, pekara nya nyau nating belanja semua raban laban nyau ngaga bayar ke chukup besai.
“Tambah mega kami nya nyau bebayarka suwa ba rumah bukai ke chukup mar ba sebelah Kuching,” ku iya.
Berebak enggau nya, Yusman ngarapka perintah ulih meri perati enggau mantu raban pemeli ke udah asai dikemula lalu ngarapka pekara tu ulih teputar enggau lengkas ba suku taun keterubah taun baru (2022).
“Nyema kunteriktor Multi Heng Development Sdn Bhd tu bedau ulih mutarka penanggul tu…kami deka hak kami, duit kami diberi pulai.
“Kami minta raban bekaul beratika baru atur enggau akta rumah ke dipeda semina nguntungka kunteriktor aja lalu pemeli nadai dijaga nyema ayan penanggul ke baka tu,” ku iya.
Lebuh ditanya kati sida udah ngaga ripot polis enggau tribunal, iya madah raban pemeli udah ngaga ripot enggau nagih ngagai tribunal nyentuk kes nya udah dibai ngagai kort tinggi.
Nangkan ke nya, siku agi orang ke sama meli rumah ba endur nya, Islamiah Hashim, 39, bela asa laban juluk deka meli rumah enda nitihka semaya ke udah ditetap.
Ku iya, pengelama nganti kenyau ari projek nya digaga diasaika nadai reti laban nyentuk diatu agi numpang enggau sida sebilik empu.
“Aku chukup asa. Enti nitih aku bisi rumah kediri empu tang laban projek tu ditangguh kami lalu bedau ulih pindah kitu.
“Nya alai, aku ngansak perintah meri perati ngagai penanggul tu lalu arapka kunteriktor nembuka rumah tu baka ke udah disemaya,” ku iya.
