Mayuh kerejasama digaga China enggau Sarawak

KUCHING: China sedia nyaup Sarawak ba pemansang infrastruktur enggau teknologi.

Tu nyengkaum negapka kerejasama ba pengawa dagang, betanam betupi, ekonomi digital, kilang enggau pengeluar kuasa.

Konsul Jeneral Republik Rakyat China di Kuching, Cheng Guangzhong madahka nyadi menua ekonomi kedua pemadu besai dunya, sida sedia bekunsi penau ngemansangka menua tu kelebih agi ba bidang teknologi sereta pemansang infrastruktur. 

“Kitai mega udah nanggam mayuh kerejasama lalu naka tu, bisi 27 serikat China di Sarawak sereta 28 bengkah projek pemansang benung didiri.

“Pia mega, pemadu baru nya kerejasama ngaga Jematan Batang Lupar ba Sebuyau iya nya jematan pemadu panjai meraka sungai ba Malaysia ti begunaka sukung teknologi enggau industri kilang ti tegap.

“Projek jematan tu deka dipejalai serikat China Railway Major Bridge Engineering Group Co. lalu sempekat udah disain dalam bulan November taun nyin kemari,” terang iya.

Cheng Guangzhong mansutka jaku nya rambau randau khas begulai enggau Suara Sarawak, ditu ensanus.

Ku iya, menua China dikelala dunya endang maju ba pemansang infrastruktur lalu nya pekara ke manah ba pemansang menua tu.

“Sekumbang tiga taun gawa ba Sarawak, aku gaga meda pemanah kaul kerejasama ba mayuh pekara.

“Nya alai, kaul kerejasama nya mesti ditegap nyengkaum dalam sektor ekonomi digital, kuasa sereta kilang laban menua tu bisi pengulih besai.

“Kitai mega nemu Kepala Menteri Datuk Patinggi Abang Johari Tun Openg endang ngemeratka inisiatif digitalisasyen.

“Nya kebuah, China deka terus nyukung kerejasama entara Sarawak enggau China sereta Alibaba Sarawak dalam pemansang ekonomi digital.

“Kami deka negapka kerejasama e-dagang laban nya beguna amat ungkup ekonomi lalu kitai deka besaup enggau belajar ke pemaik begulai,” terang Cheng.
Bekaul pengawa betanam betupi, iya madahka serikat China, Guangken udah mujur ba pengawa nanam getah ba menua tu.

“Pekara tu nentuka kami ulih nyaup ngerembaika kaul kerejasama ba pengawa sains enggau teknologi dalam pengawa betanam betupi ngambi nyungkak ekonomi Sarawak ngagai tikas ke tinggi agi.

“Berebak enggau nya, China nya ngembuan kuasa besai dalam pengawa betanam betupi iya nya 19 peratus pekebun enggau tujuh peratus tanah dikemansang ba pengawa betanam betupi di serata dunya,” terang iya silik agi.

Sama datai Konsul Jiang Ying enggau Shao Xiao ari Konsulat General Republik Rakyat China di Kuching.

Suara Sarawak