Mayuh menua ulu bedau datai arus internet 3G, 4G

BETONG: Perintah naka ulih nentuka arus penyambung 2G ke agi dikena ba mayuh endur lebih agi sitak menua ulu enggau menua pesisir ulih dikemanah lengkas baka ba enudr bukai ke udah bisi arus internet 3G enggau 4G.

Sapit Kepala Menteri Datuk Amar Douglas Uggah Embas madah, ambika banding ba menua Ulu Layar, Nanga Tiga agi bisi penanggul arus penyambung.

“Bisi tiang menara telekomunikasi, tang semina 2G. Nadai bungkur data 3G enggau 4G ke ulih dikena muka internet.

“Nya alai, diatu kitai bekerejasama enggau penyendia arus penyambung nentuka komunito ditu ulih kena bungkur data internet enggau lengkas.

“Aku mega ngansak ejensi bekaul ngaduka pekara tu. Nya alai, nya dikena nentuka semua sekuka ba menua ulu enggau menua pesisir ulih muka internet.

“Tu beguna ungkup pemansang pelajar bala anak ditu,” ku iya.

“Iya madah munyi nya ngagai pemberita pengudah bejadika Program Outreach Petronas di SK Saint John, Nanga Tiga, kemari.

Tandu iya, bisi piak udah sedia ngaduka pengawa ngemanahka bungkur internet tu.

Uggah ngaku ungkus dikena ngaduka pekara tu amat mar.

Lebuh ditanya bekaul enggau penumbuh komiti khas ngintu sekula repuk ba Sarawak, iya madah nya udah diambi Opis Menteri Pelajar, Sains enggau Pansik Teknologi.

Taja pia, ku iya tanggungpengawa semua patut lebih agi kepala pengajar, apai indai, pengari rayat enggau mensia mayuh beguna amat dikena nentuka program ke lebih manah dikena mutarka isu nya.

Uggah mega meransang bala anak diau bemalam ba buding.

Dulu ari nya nya, iya ngarapka program Petronas serak tu ulih nyadi pelasar ngubah runding sereta ngaduka komuniti ngambi nyadi lebih maju.

Suara Sarawak