KUCHING: Mayuh pekara besai dalam Sempekat Malaysia 1963 (MA63) mujur dipejalai sekumbang Perintah Perikatan Nasional (PN) megai menua, ku Datuk Seri Alexander Nanta Linggi.
Kaban Parlimen Kapit nya madah, penerang dibantaika Kaban Parlimen Bandar Kuching Kelvin Yii berhubung MA63 nya udah nuduh tauka sengaja enggai nyukung mosyen Yang di-Pertuan Agong Kaban Parlimen Betong Datuk Robert Lawson Chuat.
“Reti iya, Kelvin puntan meretika jaku nya nyentuk iya enda nemu pemujur randau MA63 ke udah disebut.
“Enda meretika utai tang nyalahka orang. Rayat Sarawak suah betanya lalu madah, pengelama Perintah Pakatan Harapan (PH) merintah 22 bulan, nama pemansang dibai ngagai Sarawak?
“Ni danji manis ke udah ditabur ngagai rayat? Ni manifesto ungkup Sarawak baka ti disemaya? Ni danji manifesto PH deka mulaika baru 50 peratus chukai digumpul di Sarawak? Nama semangat MA63 ke mujur dikerandau enggau dipejalai PH,” ku tanya iya ba Aum Parlimen kena Hari Tiga tu tadi.
Iya mega nanya nama pengawa dikereja Kelvin ngagai Sarawak lebuh diberi peluang laban maya nya bisi kuasa ngaga ubah.
“Nyadi Menteri Dagang Dalam Menua enggau Pekara Penguna (KPDNHEP), aku ngarika semua Kaban Parlimen ari Gempung Parti Sarawak (GPS) patut mantah jaku ke jai ke udah ngamahka pemanah tanggam kaul entara PN enggau Perintah Sarawak ngelama tu.
“Aku berasai lantang enggau gaga ati laban udah ngemata sereta sama dalam randau MA63 nya.
]
“Entara pekara ke udah disetuju iya nya dikelaung minta pemendar Akta Kemajuan Petroleum (PDA) enggau lisin nengah Akta Kawalan Bekalan (CSA) diberi ngagai pemegai lisin Ordinan Pengagihan Gas (DGO) 2016 berengkah 1 June 2021.
“Ex-Menteri Besai, Tan Sri Muhyiddin Yassin mega meri pemendar ngagai SEDC Energy nyual petrol, diesel enggau produk petroleum bukai chara hiliran lalu nyadi serikat minyak penuh di baruh chap dagang kediri empu,” terang Nanta.
Pia mega ku Nanta, perintah ke dulu mega meransang Sarawak terus chakah dalam industri minyak enggau gis lebuh dikelaung ngena PDA 1974 dan CSA 1961 ba pengawa ngemata enggau atur gas petroleum cecair (LPG).
Entara pemujur bukai ke udah dijapai sebedau tu iya nya dikemendar nyungkak sektor ekonomi nengah bayar chukai jual nengeri (SST) lima peratus ngagai eksport produk petroleum ari nengeri tu seriris enggau ordinan cukai jualan negeri 1998.
“Pekara nya ulih meri penguntung lebih ari RM3 bilion setaun ngagai Perintah Sarawak.
“Perintah ke diatu keran deka berandauka pekara bukai bekaul isu pemansang sektor ekonomi di Sarawak.
“Anang nempa cherita enti enda nyidi pekara ke amat. Sekali kita udah bula, orang sigi enda pechayaka kita agi, badu mih bepolitik lalu sama mih kitai nyadi ‘Keluarga Malaysia’ ngemansangka ekonomi menua,” ku Nanta.
