KUCHING: Aum Besai Indu Dayak di Palan Aum Borneo Kuching (BCCK) kemari nerima timbal positif raban indu Dayak di serata Sarawak.
OPHELIA TAMBONG JAWAN, 45.
“Aku Tuai SIDS Pampang Kanowit berasai gaga laban ulih datai ngulu aum tu. Aum tu patut diatur baru udah tu ila. Mayuh penemu ulih ditemu kitai ari aum tu kelebih agi indu Dayak. Kelimpah ari nya, aum tu meri peransang ngagai semua kitai.”
PAMELA MALAYSIA ACHOH, 51.
“Aum besai tu manah endar diatur kelebih agi ngagai orang dagang mit baka aku ti bejual produk kraf enggau pemakai tradisional. Tu meh peluang ti patut dikena ngelakuka barang kitai. Mayuh penemu ditemu maya tu kelebih agi kaul rama, kaul dagang enggau ke bukai.”
JESSIE TIMAH KANDUN, 48.
“Aum besai tu meri penerang enggau muka runding raban orang indu Dayak. Ari aum besai baka tu kami bulih penemu sentang pekara ekonomi, dagang enggau pekara bukai ti bekaul. Aum baka tu patut digaga baru awakka meri empas ti dalam agi ngagai komuniti.”
BERNADATT KELUMEH, 63.
“Aum besai tu manah laban meri penemu enggau bejuraika pekara pasal orang indu kemaya hari. Kelebih agi topik ti dibantaika sida endang bekaul enggau raban orang indu. Aku empu ngasaika pekara tu muka runding bala kami ti datai ari jauh. Kitai ulih meda baka ni sida ngatur pengawa. Semua pekara ti dibantaika endang chukup relevan ngagai indu Dayak.”
