SONG: Menteri Dagang Dalam Menua enggau Pekara Penguna (KPDNHEP) Datuk Alexander Nanta Linggi madah, Bagi Menua Kapit udah nerima mayuh pemansang ari Perintah Sarawak nengah agih belanja Ejensi Pemansang Ulu Rajang (URDA).

Kaban Parlimen Kapit nya madah, program ekonomi rama dikena nyungkak ekonomi peranak menua pesisir mega bisi dipejalai kelimpah ari projek infrastruktur.

“Entara nya, numbuhka palan ngumpul ba Song ngambika peranak dia ulih nyual produk sida.

“Kitai enda ibuh ngagai Kapit laban ditu udah bisi palan ti disedia ungkup nyual produk,” terang iya.

Nanta mansutka jaku nya ba Pengawa Nyuaka Chek Projek Mit Pemansang Menua Pesisir (MRP) di Rumah Japok, Nanga Senyaru, Sungai Musah, ditu ensanus.

Ba pengawa nya, Nanta udah nyuaka geran MRP penyampau RM335,500 ngagai 30 Komiti Pemansang enggau Pengelikun Genturung Pendiau (JKKK) rumah panjai ba sitak menua dipegai Penghulu Galau.

Ku iya, kandang menua Kapit enggau Song nadai tinggal pemansang pengudah penumbuh URDA ti nyadi ejensia pengatur ba sebarang pekara bekaul pemansang.

Nya alai, iya ngelalau peranak ditu terus meri peluang ngagai perintah bejalaika pemansang.

“Peluang ti diberi kita tu beguna amat ngambi nambahka mayuh agi pemansang ba kandang menua tu dudi hari,” ku Nanta..

Nangkan nya, Nanta ngelalau penerima chek MRP ngena manah agih belanja tu ungkup pemaik semua.

“Kena manah agih belanja diagih perintah tu ungkup pengelantang semua.

“Pia mega, kena agih belanja tu ungkup pemansang ba rumah panjai kita,” tandu iya.