Mayuh rayat bejalaika pengawa betanam betupi sekumbang PKP

BAU: Bemacham penanggul ditapi ketegal pandemik Covid-19 enggau Atur Mindah Betagang (PKP) kenyau ari taun nyin kemari ngujungka pengawa betanam betupi mayuh dikereja mensia mayuh di pelilih Bau.

Adun Tasik Biru, Datuk Henry Harry Jinep madahka pekara tu mega dikereja laban sida enda tusah tauka nangi bebelika pemakai maya PKP.

“Sekumbang PKP tu, kitai tusah deka mindah ke bukai lalu reti iya, kitai mesti berundingka chara bukai ngiga pemakai.

“Terubah PKP taun nyin kemari, kitai tusah ngiga sayur enggau pemakai tang pengudah tiga bulan, kitai udah meda genap rumah udah berengkah betanamka sayur enggau utai tanam bukai,” terang iya.

Henry mansutka jaku nya ngagai pemberita pengudah bejadika Pengawa Nyuaka Wang Turu Kereban Betanam Betupi (AFF) ba Balai Mayuh Guna Kampung Skiat Baru, ditu ensanus.

Nambahka nya ku Henry, tebal agi nembiak udah berengkah ngambi bagi ba pengawa betanam betupi nengah makit digital.

“Enti ngelama tu, apai indai ti suah nanam sayur lalu anak sida nyual ba tamu enggau nengah online.

“Nya kebuah, sekeda genturung pendiau ba sitak aku bisi tepansutka asil manggai RM 100,000 sebulan,” terang iya.
 

Beduduk ari nya, Henry ngemeratka pemesai guna peranak ngereja aktiviti betanam betupi dikena ngubah tikas idup sida.

“Kitai deka bulih untung enti bebendar ngemansangka pengawa betanam betupi kelebih agi maya pandemik Covid-19 lalu kitai enda ulih mindah ke bukai.

“Pengawa betanam betupi nya entara pengawa ke nadai pengerugi laban semua orang begunaka pemakai nadai ngira sekalika pandemik tauka penusah bah tauka ke bukai,” ku Henry nerang baru.

Suara Sarawak