Mayuh sitak ngasai tempias pemansang

KOTA SAMARAHAN: Kota Samarahan nya pintu penama ngagai jalai tebing pantai, pia ku Kepala Menteri Abang Johari Tun Openg.

Ku Abang Johari, sitak bukai mega bela deka ngasaika tempias pemansang ti sebaka enti sitak nya ngembuan pemansang ke meruan enggau manah agi.

“Pemansang tu deka dikemansang ngagai sitak bukai nyengkaum Sebuyau ari Asajaya, Sadong Jaya, Sebuyau ngagai Lingga nyentuk ngagai Batang Rajang.

“Nya kebuah, sitak bukai mega manah agi enti ba nanga udah bisi pemansang,” ku iya nerang ngagai pemberita rambau ngabas ngagai Sungai Kampung Pinang, ditu pagi tadi.

Nambahka nya, iya mega madahka sektor betanam betupi ba sitak nya deka dikemansang laban bisi utai tanam ke bepengulih besai baka pisang, nyiur enggau nanas.

“Ke bukai, kitai ulih nanam sayur ngena sistem hidrofonik enggau sayur nya deka nambahka penatai pemisi ba sektor betanam betupi,” ku iya.

Iya mega andalka sitak nya deka ngemansangka industri agro enggau deka mansang ngagai sitak Sebuyau.

“Taja pia, pengawa nanam pun nyiur benung chakah dipejalai laban rega buah nyiur ba makit luar diatu majak manah.

“Kitai ulih nyual buah nyiur enggau deka ngubah ekonomi orang bumai ti dikemansang ngena chara baka nya,” ku iya.