KUCHING: Kaunsil Mengeri Kuching Selatan (MBKS) nerima belanja penyampau RM50,000 ari KTS Mutual Sdn Bhd dikena ngatur Kuching Zumba Fiesta 2023 beserimbai Festival Kuching 2023 ti deka diatur kena 19 Ogos tu.
Datuk Bandar Kuching Selatan, Datuk Wee Hong Seng madah, belanja nya beguna amat dikena nyendiaka peluang berega ngaul mensia mayuh.
Ku iya, program Festival Kuching semampai ngemeratka inisiatif narak semangat begulai, pengerami enggau betukar budaya.
“Nengah sukung belanja tu, kami ulih ngatur sekeda program ngaul komuniti ke deka meri pemaik ngagai peranak Kuching.
“Ari nyendiaka peluang pelajar ngagai nyukung artis menua, pekara tu udah meri empas positif ngagai komuniti kitai.
“Kami temegah bisi bakih kunsi ti bisi tunga kuing negap kerejasama mensia mayuh enggau meri pulai ngagai komuniti,” ku iya ba aum pemberita di Begunan MBKS, kemari.
Berebak enggau nya, Hong Seng ngansak pedagang enggau organisasyen begulai nyukung pengawa baka tu.
“Kerejasama kita beguna amat ngambi mai ubah besai ngagai mensia mayuh,” terang iya.
