Media enggau KKR mesti bekerejasama nagang pengerembai berita bula di media rama

KUCHING: Pengemeran media dipinta bejalaika pangku pengawa nyaup perintah nagang pengawa ngerembaika berita bula pasal polisi lebih agi nengah media rama.

Menteri Kanan Kereja Raya, Datuk Seri Fadillah Yusof madahka pekara tu beguna amat ngambi mensia mayuh enda saru penemu pasal polisi perintah nya.

Ku iya, kerejasama rat enggau sukung tegut raban media nagang pengerembai berita bula pasal polisi perintah endang patut dipuji.

“Nya alai aku ngarapka gempuru sehari tu nyadi pelasar ngerapitka agi tanggam kaul entara Opis Menteri Kereja Raya (KKR) enggau raban media.

“Awak tu mega dikena kitai bekelala, betukar buah runding enggau ngerembaika penemu ngambi ulih ngiga chara pemadu nemban dikena KKR napi penguji kemaya hari,” ku iya.

Fadillah mansutka jaku nya ba Program Gempuru Menteri Kanan Kereja Raya Begulai Enggau Editor Media Sarawak ba sebengkah hotel tebilang ditu, ngalihari tadi.

Iya madah, gempuru tu mega kelai ngenang jasa enggau pengiruh raban media di Sarawak ke nyadi bakih strategik KKR ngelama tu.

“Aku ngarapka pemanah kaul entara KKR enggau ejensi media di Sarawak tu semampai rat enggau teguh.

“Besai amat pengandal aku ba kita (media) ulih mantu KKR naburka penerang beguna ngagai rayat bekaul inisiatif KKR setipak enggau rambai jaku Nuju Pengelantang Rayat,” ku Fadillah madah nyemetak.

Sama datai Presiden Serakup Pengarang Berita Kuching (KJA) Jacqueline R. David, Ketuai Pegawai Eksekutif Suara Sarawak enggau New Sarawak Tribune (SV/NST), Dr Jeniri Amir enggau bala temuai dipebasa bukai.

Suara Sarawak