Media ngubah runding komuniti

KUCHING: Media ngembuan tanggungpengawa ti besai dalam ngubah runding komuniti.

Ketuai Pemesai Eksekutif Suara Sarawak Dr Jeniri Amir madahka nya kebuah pemesai guna media enda ulih dikemaruhka sengapa.

“Media arus perdana baka surat kabar nyadi siti pekara ba pengawa bekunsika penerang, idea, penemu enggau timbal bekaul enggau pekara tu nyadi nengah randau rasional sereta bela,” ku iya.

Dr Jeniri madah munyi nya lebuh bejaku ba pengerami Makai Lemai Keterubah Suara Sarawak ba sebuah hotel tebilang ditu.

Nangkan nya ku iya, Suara Sarawak ukai semina mantaika penerang ari renggat atas ke baruh, tang mega berengkah ari renggat baruh ke atas engkeman enggau prinsip ‘free market place of ideas’.

“Kelimpah ari ngangkatka jaku ari pemesai, kami mega mantaika penanggul, runding enggau aspirasi rayat menua sereta suara bala penyakal.

“Ba pengawa demokrasi ke amat, kelebih agi ba era demokrasi digital tu, suara rayat enda tau dilakka pia aja tauka diketuka,” ku iya.

Nya alai, Dr Jeniri madahka penatai surat kabar meseti seruran disukung laban nengah pengawa pemberita ti enda bebelah bagi ulih ngintu komuniti enggau tuju mansutka demokrasi ti bepengerai.

Kelimpah ari nya, iya ngarapka Suara Sarawak seruran beretan lalu minta semua piak seruran meri sukung ngagai surat kabar nengah pengawa meli, macha lalu mantaika iklan ba surat kabar nya.

“Pemujur Suara Sarawak enggau surat kabar bukai tu ngambika ulih beretan lama ba menua tu bepanggai ngagai sida ke macha, bala pengiklan, penyukung sereta piak ti mayuh meri kerejasama sebedau tu,” ku iya.

Suara Sarawak