Media Sarawak agi nganti timbal ari Perintah Besai

KUCHING: Media di Sarawak agi nganti timbal Perintah Besai ngambika peminta raban media diengkah ba kategori raban terabai komuniti nerima vaksin Covid-19 ulih diperundingka.

Chairperson Gerempung Besai Pemberita Sarawak (FSJA) Jacqueline Nur Atiqah Abdullah madahka, raban media keterubah iya ditukuka nyadi raban terabai komuniti di Sarawak, nya alai sekeda ari sida bisi nerima vaksin ba renggat keterubah.

Ku iya, ba renggat keterubah Komiti Penyangga Penusah Ngenyit Nengeri (JPBN) enggau kerejesama Opis Menteri Pengerai (KKM) semina meri 13 penuduk ngagai raban media seraya sida ke bukai agi nganti ripih diri nangkan tu ila.

“Taja pia, maya nganti penatai vaksin nangkan ke tu, KKM udah ngeluarka notis ti madahka raban media ukai sebagi ari raban terabai menua.

“Pekara tu udah meri penanggul ngagai program vaksin ti diperambu, laban kami udah nganjung 200 iku nama raban media di menua tu nerima vaksin ba renggat kedua ila,” ku iya lebuh ditanya pemberita pengudah aum besai ninting taun (AGM) KDJA ba sebuah hotel ditu, kemari.

Jacqueline mandangka poster udah nerima tuchuk vaksin kedua.

Jacqueline ti mega Penyanding Penemu KDJA madahka Gerempung Pemberita Nasional (NUJ) deka nganjung surat ngagai Menteri Sains, Teknologi enggau Inovasyen ti mega nyadi Menteri Pengatur Program Imunisasyen Nasional Covid-19 bekaul program vaksin media di selampur menua.

Pia mega, iya madahka sepenyampau 1,700 iku nama pemberita di selampur menua udah disua ngagai menteri ungkup program imunisasyen nya.

“Taja pia, naka malam kemari Khairy agi bedau meri timbal bekaul penanggul tu lalu kami agi nganti nyentukka ujung bulan tu ila.

“Nyema peminta nya ditulak, media di Sarawak deka bepanggai ngagai Perintah Sarawak empu laban perintah deka meli vaksin kediri.

“Kelimpah ari nya, kami mega deka merambu ngagai Perintah Sarawak ngambika sida ngenukuka raban media nyadi raban gawa di luan sereta ulih diberi vaksin tumu,” ku iya.

Iya madahka media di selampur menua nyangka deka mantaika pengeringat ngagai Perintah Besai enti raban media enda diengkah ba kategori raban terabai komuniti.

“Maya Covid-19, media suah bejalai ke luar ngaga berita enggau napi penanggul mudah kena rampit sebaka enggau raban soldadu, polis enggau pengereja KKM. Nya alai, kitai patut diberi peluang divaksin,” ku iya.

Ngelansa pasal pejah ngagai 13 iku raban media ti dulu nerima vaksin ba renggat keterubah, iya madahka raban media ti dipilih nya ari Bagi Menua Kuching, Sibu, Miri enggau Bintulu.

“Renggat keterubah vaksin diberi ngagai kaban supreme gerempung pemberita di Kuching enggau Sibu nyengkaum tiga iku pemberita vateren.

“Kelimpah ari nya, sida ke bukai ti patut diberi vaksin endang raban pemberita ti gawa ba luar tang penanggul nya enda ulih diputarka laban notis ari KKM ti enda ngerintaika media nyadi raban terabai komuniti,” ku iya.

Nangkan nya, Chairman baru KDJA Ronnie Teo madahka, iya deka terus negika hak raban media Sarawak enggau ngarapka raban media di menua tu diberi vaksin tumu.

“Kami mega deka terus ngatur enggau minta pengawa tu dikemujur nengah atur ke pemadu badas,” ku iya.

Suara Sarawak