ARTIKEL

Menang alah adat bepekit, kami tetap temegah

Facebook
Twitter
LinkedIn
WhatsApp
Telegram

JOM BACA E-PAPER SUARA SARAWAK/ NEW SARAWAK TRIBUNE PERCUMA SEAWAL 2 PAGI SETIAP HARI. KLIK SINI

KUCHING: Menang tauka alah endang udah adat bepekit, tang kitai ke nyadi apai indai deka semampai besampika pemujur anak diri empu.

Jaku nya dipansutka Pamg Jodeng, apai Pandelela Rinong pengudah anak iya semina lumur 12 ba renggat kepenudi Pekit Terejun 10 Meter Platform Individu Indu, Lumpa Olimpik Tokyo, lemai ensanus.

Ku Pamg, taja lenyau peluang mai sebarang midul ba lumba tikas dunya nya, tang iya enggau sida sebilik chukup temegah ati meda penyulut dijapai anak dara iya ngelama tu.

“Lumba Olimpik 2020 mayuh pemar ari sukut runding enggau pengeregas tubuh bala atlit sekumbang ke bepekit ketegal pandemik.

“Aku ke nyadi apai Pandelela, tentu mega temegah ati laban anak aku udah mujur datai ba renggat Olimpik lalu udah masuk renggat kepenudi ba Pekit Terejun 10 Meter nya.

“Endang enda ulih dikenggaika semua kitai, Pandelela diuji ari sukut runding enggau tubuh iya. Tang aku pechaya, iya udah naka ulih enggau orang bepekit, nya udah chukup ba aku,” ku iya lebuh dirandau pemberita, ensanus.

Pamg mega ngarapka Pandelela semampai ransing ba pekit deka datai lalu enda mantul ati ngambi ulih dipilih masuk Lumba Olimpik nangkanka tu.

Iya madah baru, udah adat kitai bepekit bisi menang enggau alah tang pekara pemadu beguna anang mantul lalu berani nguji baru ba pekit bukai.

“Kami duai indai iya semampai besampika pengelikun, pengerai enggau pemujur Pandelela ti benung bepekit di menua orang, mai pengandal ngagai semua.

“Ari nya, aku nusun sepuluh jari minta ampun ngagai semua rayat Malaysia laban juluk ati kitai bulih midul ba Olimpik sekali tu enda ulih dijapai.

“Aku mega deka meri terima kasih besai ngagai semua ti seruran meri sukung enggau jaku peransang ngambi ngeringka semangat iya ngelama tu,” ku Pamg.

Pandelela masuk renggat kepenudi pekit nya nyempulang 11 iku penerejun pemadu nyulut pengudah nembuka renggat kedua kepenudi ba penuduk lumur tujuh enggau 315.75 puin pengudah lima kali terejun.

Ba pekit renggat kepenudi diatur ba Palan Akuatik Tokyo kena lemai Hari Tiga tu tadi, Pandelela ngapuska Pekit 10 Meter Platform Individu Indu ba penuduk kepenudi ari 12 iku pemekit.

Pandelela sebedau tu kala menang midul pirak ba Pekit 10 Meter Platform Seirama bepadu enggau Cheong Jun Hoong ba Olimpik Rio 2016 enggau engkeraju ba Pekit 10 Meter Platform Individu Indu ba Olimpik London 2012.

BERITA LAIN

BERITA TERBARU