Menih bansa orkid baru

Juma’ani In-Vitro Laboratory

KUCHING: Gerempung Orkid Sarawak (Sarorso) keran deka ngintu bansa orkid menua nengah ‘Juma’ani In-Vitro Laboratory’ di Maktab Rendah Sains Mara (MRSM) ditu.

Presiden Sarorso Zurenawatte Zaidel madahka tuju pengawa numbuhka makmal nya dikena bejalaika mikropropagasi tauka dikumbai nerenak benih bansa orkid baru.

Ku iya, makmal nya ditumbuh ba MRSM ngambika ulih ngembing enggau nyeridi ulah bala nembiak kelebih agi ba renggat sekula angkunka utai tumbuh baka orkid tu.

“Projek nerenakka benih orkid ba makmal tu nyadi projek keterubah dipejalai di Malaysia.

NGARAPKA PEMUJUR… Juma’ani (kiba) enggau Datuk Bandar DBKU Datuk Abang Abdul Wahap Abang Julai dipebasa bejadika Juma’ani In-Vitro Laboratory di MRSM ditu, pagi tadi

“Kami mega ngaul bala nembiak sekula ba projek tu laban sida tu rebak baru ti deka nampung pengawa ngintu bansa orkid dudi hari,” ku iya madah nyemetak.

Zurenawatte mansutka jaku nya lebuh dirandau pemberita pengudah Pengawa Bejadika ‘Juma’ani In-Vitro Laboratory’ di MRSM ditu.

Presiden Gerempung Pengasih Bini-Bini Menteri Sarawak (Sabati) Datuk Amar Juma’ani Tuanku Haji Bujang dipebasa bejadika pengawa nya pagi tadi.

Nangkan nya ku iya, sida nempa kaul kerejasama enggau MRSM sereta Dewan Bandaraya Kuching Utara (DBKU) nentuka pemujur pejalai projek nerenakka benih orkid ba sekula nya.

“Naka diatu, projek benung ba timpuh diuji lalu enti projek nya mujur, kami deka ngerembaika projek tu ngagai serap menua Sarawak.
“Dudi hari, kitai deka ngaul sekula bukai begulai bejalaika eksperimen sereta belajarka penemu pasal mikropropagasi tu,” ku iya nambah.

Ku Zurenawatte, makmal dikena bejalaika projek meranakka orkid nya sebagi ari pengawa dipejalai piak Sarorso nentuka utai tumbuh baka orkid enda punas di menua tu.

“Kandang dua hari ke udah, projek tu mujur meranakka lebih 20 bansa orkid menua,” ku iya.

Pengari ari Writhlington School Orchid Project, Dr Simon Pigh Jones enggau raban bukai mega bisi ngaul diri ba projek seraya bekunsi penemu bekaul enggau pengawa menih orkid.

“Sida deka nampung kaul kerejasama begulai enggau kami ba projek tu,” ku iya nandu.

Suara Sarawak