Menteri Besai muji filem Dayak betikas entarabansa

KUCHING: Menteri Besai Tan Sri Muhyiddin Yassin muji pemujur raban produksyen filem ngatika diri Belaban Hidup: Infeksi Zombie ti udah mujur nyadi champion kategori Berantu enggau Sains Fiksyen ba World Film Carnival (WFC) Singapura 2021 apin lama.

Nengah penerang ke dibantai ba laman Facebook iya ensana, Muhyiddin madahka meri pengaga ati ngagai semua raban bekaul ti ngaga filem tu nyengkaum penerbit enggau direktor filem Ray Lee seduai Misha Minut.

“Pemujur filem tu deka nyadi peransang pemain industri kreatif menua ngagai renggat entarabansa.

“Nya nandaka, menua kitai agi bisi ngembuan raban pengelandik sereta peneleba kereja seni ti bekualiti seikas entarabansa,” ku iya.

Tandu iya, kelimpah ngemegahka nama Malaysia, filem tu mega udah ngangkatka pengaya adat enggau asal Sarawak ngagai menua luar.

“Aku pechaya filem ti ngaul cherita berantu enggau belaban raja berani Dayak Sarawak tau ngelakuka Malaysia kelebih agi baka bansa, seni enggau jaku di Sarawak ngagai selampur dunya.

“Ngarapka filem tu ulih dipandangka ba panggung wayang bulan Ogos tu ila kelimpah nerima timbal ti manah ari orang ti rinduka filem menua,” ku iya.

Filem Belaban Hidup: Infeksi Zombie becherita pasal seraban nembiak patu balu ti dikurung siku saintis gila nyadi barang pansik iya.

Filem tu mega dichalun ba Karnival Filem Entarabansa di Rusia ba kategori Filem Pemadu Manah enggau kategori Filem Berantu Pemadu Manah kena 27 March.

Filem Belaban Hidup: Infeksi Zombie champion ba kategori Berantu enggau Sains Fiksyen ba World Film Carnival (WFC) Singapura 2021 apin lama ke udah.

Suara Sarawak