Menteri betukar, projek tetap bejalai

KUCHING: Enda ngira sapa nukar Dr Maszlee Malik nyadi Menteri Pelajar, projek ngaga enggau ngemanahka sekula repuk di Sarawak tetap dipejalai.

Pekara nya dipansutka Menteri Pelajar, Sains enggau Pansik Teknologi Dato Sri Michael Manyin Jawong maya meri timbal bekaul enggau pemutus ke digaga Dr Maszlee ngelepaska pangku pengawa berengkah 3 Januari 2020.

Iya madah munyi nya lebuh dirandau kena Hari Lima tu tadi, madah penuduk menteri kabinet nya dileka langsung nadai meri pangka ngagai projek ke benung dipejalai.

“Enda, sapa aja ke deka diambi mangku pengawa nyadi Menteri Pelajar, iya deka neruska tanggungpengawa, penemu aku kediri andalka pekara nya,” ku iya.

Iya madah munyi nya lebuh dirandau nengah Whatsapp sentang timbal iya bekaul pemutus Dr Maszlee ke bela ditemu mensia mayuh ngelepaska pangku pengawa nya nengah sebengkah aum pemberita ke diatur ba Putrajaya kena Hari Empat tu tadi.

Sekula di Sarawak.

Kenu ku Manyin, nengah Langgur Pemansang Malaysia Ke-11 (RMK11) urung 196 sekula repuk tauka 19.2 peratus ari penyampau semua 1,020 sekula repuk ba selampur Sarawak udah dikemanah naka tu.

Perintah Besai ku iya udah nguna belanja urung RM678.97 juta ungkup nengeri tu ba pengawa ngemanah, ngadu tauka ngaga baru semua sekula ke repuk kenyau 2016 nyentuk diatu hingga kini.

Iya madah, RM100 juta diagih Perintah Besai nengah Bajet Menua 2020.

Ngelansa pasal agih belanja RM1 bilion ari Perintah Besai, bayar keterubah chara kontra penyampau RM350 juta udah dibayar Perintah Nengeri ungkup 37 sekula keterubah ba nengeri tu.

Berebak enggau nya, bayar kedua enggau ketiga penyampau RM350 juta enggau RM300 juta diperambu dibayar kena Januari enggau Jun taun tu.