Menua deka likun agi

KUCHING: Perintah Sarawak diansak berundingka perambu ngidupka baru Sarawak Rangers enggau Border Scout ba menua tu.

Ketuai Pemadah Parti Bansa Dayak Sarawak Baru (PBDS Baru) William Mangor madah, pengawa numbuhka dua entiti nya deka mai mayuh pemaik kelebih agi ngagai rayat Sarawak empu.

“PBDSB ngasaika peminta Menteri Muda Elektrik Menua Pesisir Liwan Lagang dekaka Sarawak Rangers enggau Border Scout diidupka baru.

“Kelimpah nyaga pengelikun, pengawa tu mega ulih ngerandang awak nempa pengawa puang sereta nerenak ulah talukka menua.

“Rayat Sarawak empu udah tu nemu agi kuing menua diri lalu nadai ati dua ngetanka pengelikun,” ku iya ba penerang berita, kemari.

WILLIAM MANGOR

Nya alai ku iya, perambu enggau juluk nya patut nyadi nyata sereta dirumban berindik ari pemutus Presiden Indonesia Joko Widodo mindahka indu mengeri sida ngagai Kalimantan.

“Kami pechaya, pemayuh parti, organisasyen enggau rayat ditu empu sepenemu enggau setujuka penemu nya.

“Kitai ukai leluba ngelih penemu bala bukai tang berundingka pemanah enggau pemaik ari pengawa tu,” tandu iya.

Ambika chunto ba Johor bisi raban soldadu iya empu lalu nadai kebuah Perintah Sarawak ngemujurka juluk tu.

Kebuah pia ku iya, garis entara menua Sarawak enggau menua Indonesia, Brunei sereta Sabah chukup besai lalu begunaka raban gawa nyaga pengelikun dia.

“Sarawak tu nyauka mesai menua Semenanjung, nya alai endang patut bisi raban khas baka Sarawak Rangers enggau Border Scout dianjung gawa nyaga menua.

“Ukai reti kitai enda pechaya raban nyaga pengelikun ke bisi diatu, tang tuju kitai deka ngenegapka agi sida nya lalu nyikap diri napi sebarang penusah enda disadang dudi hari,” ku iya madah nyemetak.

Ku iya, sida endang nyukung pengawa enti pulaika pemaik enggau pengelantang rayat kelimpah meri peluang rebak baru gawaka bansa enggau menua.

Kelimpah ari nya, PBDSB andal Perintaj Sarawak chakah nyidi dini pendiau bala Iban Tracker ke agi idup lalu patut dibantu, abis nadai kena kitai ngayanka basa enggau ngenang jasa sida ti udah berambunka nyawa suba.

Suara Sarawak