Menua pesisir deka badu agi petang manggai taun 2023

KUCHING: Perintah Sarawak nengah Sarawak Energy Berhad (SEB) deka nentuka semua kandang menua pesisir nerima bekal kuasa karan manggai taun 2022 tauka 2023.

Kepala Menteri Datuk Patinggi Abang Johari Tun Openg madahka iya udah ngagihka bajet khas penyampau RM2.3 bilion ngambi nyambung kuasa karan ngagai menua pesisir.

“Tu belanja kitai empu laban kami deka nyikap kuasa karan ngagai peranak ba menua pesisir ngambi sida ulih ngasaika perengkaguna pemun kelebih agi ba rumah panjai, genturung pendiau enggau sekula.

“Baka ba Long Pilah, aku ulih meda pengaga ati peranak rumah panjai lebuh aku bejadika bekal kuasa karan ba kandang menua nya.

“Nembiak mega ulih belajar lalu nadai diau ba endur ti petang agi,” terang iya.

Abang Johari mansutka jaku nya rambau Anugerah Penilai Vendor Kuasa Sarawak 2020 (Sevaa) keterubah ba Palan Aum Borneo Kuching (BCCK), ditu kemari.

Ku Abang Johari, iya enggai bepanggai penuh ngagai Perintah Besai ngemansangka kandang menua pesisir laban sekeda perunding ti dichiri Perintah Besai enda nemu infrastruktur ti diguna peranak menua pesisir.

Ngelansa pasal penemuai iya ke Telok Melano lima taun ke udah, peranak dia madahka genturung pendiau sida diberi turbin angin tang sida nadai bekal kuasa karan.

“Sida masang turbin angin ba Telok Melano taja sida nemu angin nadai bepuput deras ditu lalu nya mih pekara ke enda ditemu aku.

“Sida mega keran mekalka tekat ai mit tang nadai bekal ai lalu tu mih penanggul ditapi peranak menua pesisir,” terang Abang Johari.

Nya alai, pengudah dichiri nyadi Kepala Menteri, Abang Johari ngaga pemutus ngelempai tanggung pengawa ngagai SEB mutarka isu kuasa karan ba menua pesisir.

Ngelansa pasal Sevaa, Abang Johari madahka anugerah tunggal nya dikearap nentuka kunteriktor SEB sekalika kunteriktor entarabansa tauka menua nyendiaka servis enggau kualiti nitihka standard ditetapka SEB.

Ba pengawa nya, Bituah Enterprise, SKB Engineering Sdn Bhd, EPC Synergy Sdn Bhd enggau Ecogreen Solar Engineering Sdn Bhd menggi Anugerah Vendor Kerja Terbaik sereta Pertama Printech, PC Image Sdn Bhd enggau Buruuj Engineering Sdn Bhd nerima Anugerah Pemekal Pemadu Manah.

Pia mega, Sin Yii Transport Agencies, Sarawak Information Systems Sdn Bhd enggau Tai Thong Engineering Sdn Bhd nerima Anugerah Penyedia Servis Pemadu Manah

Henry Foong Engineering, Utas Kasturi Sdn Bhd dan Perunding Dynatech Sdn Bhd nerima Anugerah Konsultan Menua Pemadu Manayh, Anugerah Vendor Bumiputera Terbaik mega diempu Utas Kasturi Sdn Bhd seraya Anugerah Vendor Bumiputera diempu Buruuj Engineering Sdn Bhd.

Sama datai Chairman SEB, Datuk Amar Abdul Hamed Sepawi, Ketuai Pegawai Eksekutif Gerup Sarawak Energy Datuk Sharbini Suhaili enggau Ketuai Pegawai Eksekutif Syarikat Sesco Berhad, Lau Kim Swee.