Menua pesisir enda dikelaung

Pemansang Ekonomi Digital

KUCHING: Pemansang ekonomi digital ba mengeri enggau menua pesisir enda tau enda setipak enggau arus pemansang.

Kepala Menteri Datuk Patinggi Abang Johari Tun Openg madahka ba perambu pemansang teknologi ekonomi digital ditu enda deka ngelaungka menua pesisir.

“Perintah Sarawak dekaka perambu pemansang ekonomi digital mungkur menua pesisir laban kitai enggaika iya tinggal ari mengeri taja kitai deka numbuhka mengeri pesaka pintar (Smart Heritage City) udah tu.

“Menua pesisir bepanggai ba industri betanam betupi nambahka penatai pemisi sida lalu teknologi deka dibai ngagai kia ngambika asil dipansut mayuh agi,” ku iya.

Abang Johari mansutka jaku nya ba Pengawa Nutup Aum Besai Entarabansa Ekonomi Digital Sarawak (IDECS) ba Palan Aum Borneo Kuching (BCCK) ditu, kemari.

KENANG KAMI… Abang Johari (tujuh kiba) begambar bebala mayuh enggau sida ti datai baum nyerumba Pengawa Nutup Aum Besai Entarabansa Ekonomi Digital Sarawak (IDECS) ba Palan Aum Borneo Kuching (BCCK) ditu, kemari.

Ku iya, pemansang teknologi baka robot enggau injin patut disikap ngagai peranak menua pesisir nyengkaum pemintar runding.

“Sarawak deka ngena tiga chara polisi ba pengawa tu baka perengka penyambung nempa ekosistem enggau ngemansangka penau nuju ngagai pengereja pintar.

“Kitai deka nagit mengeri pesaka pintar ti deka ditumbuh meruan ngembuan kaul rat sereta likun datai ba taun 2030,” ku iya madah nyemetak.

Ku iya, nuju pemansang ekonomi digital tauka IDECS ketiga tu Sarawak deka berundingka penemu bala mayuh awakka ekosistem menua meruan.

“Ba IDECS keterubah kitai ngubah runding ba pekara insfrastruktur enggau IDECS kedua kitai ngubah runding pasal perengka penyambung Sarawak.

“Nyadi IDECS ketiga tu kitai deka meda runding kita bala mayuh ngambi asil ari mayuh pekara ekonomi digital,” ku iya.

Kenu ku iya, nya kebuah Sarawak bisi tiga isi ti beguna amat ngagai ekonomi digital iya nya kuasa karan, penyampau tubuh rayat enggau pemansut asal.

“Kesatu, Sarawak bisi kuasa karan ari tekat hidro dataika ulih dibagi ngagai menua Indonesia.

“Kedua, Sarawak mega bisi penyampau tubuh rayat entara 60 ngagai 65 peratus nyadi pengereja.

“Lalu ketiga, Sarawak bisi pemansut asal ba bioteknologi enggau nanoteknologi laban menua kitai ngembuan pengelain utai tumbuh enggau utai idup sereta sainstis ba jeman deka datai,” ku iya.

Abang Johari melaba Sarawak deka berubah datai ba taun 2030 berindik ari digital teknologi ngubah ekosistem menua.

Ba pengerami nya Abang Johari mega ngemata pengawa nyain Sempekat Pemereti Ati (MoU) entara mayuh kerejasama begulai bekaul enggau pansik ekonomi digital baka Unit Komunikasyen Perintah Sarawak (SMA), IBM, Huawei, Honeywell, Fusionex enggau ke bukai.

Sama bisi datai Sapit Kepala Menteri Datuk Amar Douglas Uggah Embas, Tan Sri Datuk Amar Dr. James Jemut Masing, Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit Datuk Sri Fatimah Abdullah, Menteri Kaunsil Kandang Menua enggau Pengawa Berumah Datuk Prof Dr Sim Hui Kian, Menteri Muda Industri enggau Beranakka Puku Malcolm Mussen Lamoh, Menteri Muda ba Opis Kepala Menteri (Undang-undang, Kaul Sarawak enggau Perintah Besai sereta Matau Projek) Sharifah Hasidah Sayeed Aman Ghazali enggau ke bukai.

Suara Sarawak