Menua pesisir nuju ekonomi digital nengah SRBN

MULU: Infrastruktur arus penyambung nengah Program Rentayan Penyambung Menua Pesisir Sarawak (SRBN) deka meri pemaik ngagai komuniti kena bungkur program nya.

Adun Mulu Datuk Gerawat Gala madahka peranak Long Terawan enggau genturung besemak dia ulih ngena infrastruktur nya nambahka penatai pemisi sida enti dikena enggau manah.

Ku iya, bansa Berawan di menua nya udah nyadi kaban ekonomi digital sereta ulih rembus ngagai pelasar digital ba serata dunya.

“Semilan buah genturung pendiau ditu udah ulih ‘begulai’ enggau dunya luar kelimpah ngerandang pemansang ekonomi digital berengkah sehari tu.

“Menua sida tu endang amai jauh ari mengeri tang diatu nyau udah semak laban udah bisi arus penyambung, kaul rayat menua pesisir enggau mengeri ditempa,” ku iya.

Gerawat bejaku munyi nya rambau Program Ngelancarka SRBN ti dipenyadika Kepala Menteri Datuk Patinggi Abang Johari Tun Openg ditu, tadi.

Iya madah baru, pemisi SRBN ba menua pesisir kelai Abang Johari ngamatka semaya mai menua majak mansang ngagai ekonomi digital.

Suara Sarawak