MARUDI: Agih belanja ba baruh Projek Mit Pemansang Menua Pesisir (MRP) terang nunjukka pengeransing Perintah Nengeri ti nyukung projek komuniti enggau pemansang menua pesisir.
Ku Sapit Menteri ba Opis Premier Sarawak (Pekara Pengereja Pengawa, Imigresyen enggau Patau Projek), Datuk Gerawat Gala, agih belanja nya endang pengawa dikena nyukung bemacham gerempung enggau projek ba menua ulu.
Gerawat nyebut pekara nya ba Pengawa Nyua Geran MRP di Kompleks Lumba Marudi ditu, empai lama.
Ba pengawa nya, bisi 31 pengari ari Komiti Pemansang enggau Pengelikun Genturung Pendiau (JKKK) sereta gerempung nerima chek geran MRP penyampau RM371,910.
Gerawat mega ngarapka agih belanja ti diberi nengah geran nya ulih meri pemaik ngagai JKKK sereta gerempung ukai dikuasa perintah (NGO) dikena ngatur aktiviti sida ninting taun.
Iya mega minta bala chairman JKKK ti nerima geran ngambi bejalaika pengawa enggau manah nentuka aktiviti ti udah dilanggur ulih dikemujur.
