Menua terus likun enti rayat beserakup

KOTA SAMARAHAN: Menteri Besai Tan Sri Muhyiddin Yassin berasai temegah sereta beterima kasih ngagai Gempung Parti Sarawak (GPS) ti diuluka Kepala Menteri Datuk Patinggi Abang Johari Tun Openg laban udah madah diri tegap penemu nyukung iya ngiring Perintah Besai.

Ku iya, lebuh menua napi penanggul ti enda kala nyadi dalam sejarah Malaysia, iya begunaka sampi ari rayat di serata menua tu nyengkaum Sarawak.

“Menua kitai deka terus likun enti rayat terus beserakup.

“Kenyau aku dichiri nyadi Menteri Besai, maya nya menua endang udah napi pengerekai penyakit Covid-19 ti enda kala nyadi dalam sejarah menua,” ku iya.

Iya madah munyi nya rambau Program Betemu enggau Peranak Kota Samarahan ba Palan Ngelatih Pengajar Tun Abdul Razak (IPTAR) ditu, .

Dulu ari nya, Muhyiddin enggau bini iya ngambi awak betemu enggau peranak di Kampung Sindang Baru, Kota Samarahan lalu pejalai iya diuluka Abang Johari, Sapit Kepala Menteri Datuk Amar Awang Tengah Ali Hasan, Menteri Dagang Temuai, Seni, Main Asal Datuk Abdul Karim Rahman Hamzah enggau ke bukai.

Suara Sarawak