Menua ulu enda tinggal nerima bekal ai beresi

LONG SERIDAN: Perintah Sarawak keran nyendiaka bekal ai beresi ngagai selampur menua nyengkaum sitak ba menua ulu.

Menteri Muda Utiliti (Bekal Ai) Datuk Dr Abdul Rahman Junaidi madah, inisiatif tu ngambi nyapai tagit nyendiaka bekal ai beresi ngagai selampur menua ulih dijapai manggai taun 2025.

Ku iya, entara inisiatif dipejalai Perintah Sarawak dikena nyapai tagit tu iya nya nengah Program Bekal Ai Alternatif Sarawak (SAWAS).

“Nengah program tu, sitak menua ulu tauka endur ke napi pemar disambung ngena sistem bekal ai ke diatu deka disediaka sistem kediri empu nitihka sambung ke engkeman ba sebengkah endur,” terang iya.

Rahman mansutka jaku nya ba Program Pelajar enggau Penyedar Sawas ba Rumah Panjai Asal Long Seridan, ditu tadi.

Dr Abdul Rahman ti mega Menteri Muda ba Opis Kepala Menteri (Pekara Islam enggau DBKU) nerang, Perintah Sarawak mega ngagihka belanja RM2.8 bilion dikena bejalaika 322 projek bekal ai ba selampur menua.

“Tu entara inisiatif perintah dipegai Kepala Menteri nentuka genap rumah ari kandang menua selatan ngagai utara disediaka bekal ai beresi,” tandu iya.

Ku Rahman, penemuai ngagai Long Seridan nya endur iya beratika baru projek Sawas ke udah dipejalai kenyau setaun ke udah.
“Kitai deka nemu empas enggau pemanah projek tu ngagai komuniti ba kandang menua nya,” ku terang iya.

Nambahka nya ku iya, bisi 22 genturung pendiau enggau rumah panjai ba selampur menua udah dipejalai ba Renggat Keterubah Projek Keterubah Sawas dalam taun 2018.

“Renggat Kedua deka berengkah dipejalai taunt u ba 56 sitak menua ulu ba selampur menua enggau dipejalai Opis Bekal Ai Menua Pesisir (JBALB),” ku iya.

Suara Sarawak