ARTIKEL

Merenny temegah ngempu gelar Lulong

Facebook
Twitter
LinkedIn
WhatsApp
Telegram

JOM BACA E-PAPER SUARA SARAWAK/ NEW SARAWAK TRIBUNE PERCUMA SEAWAL 2 PAGI SETIAP HARI. KLIK SINI

Endu dara sia tampak mua senaya pegari,
Dara Mentaba nemu nanya enggau sungga dabung gigi,
Endun Menjaya chukup budi basa pandai ngambi ati,
Dayang Sambai Dara Lupai pandai di chunggai tunjuk jari,
Ngembuan pemanis penuh lupung diambi ari Batu Gelong Nyinggit Nyinggong Nyimbang Neragang.
Pandai ngelala ngelara genera pengibun ati semua orang.
Bali nama aku ti kedua iya nya, dara memelan Marenny anak Radin.

Nya meh ensumbar dara bajik Marenny asal ari Rumah Mamat, Nanga Buan, Kapit ke mega siku ari pemekit Kumang Gawai Kapit 2023.

Tuah manuk dipeda ba kaki, tuah mensia sapa nemu.

Nya meh genteran jaku ulih dikenang ari pemujur Marenny ti mujur ngempu gelar Lulong ba Pekit Kumang Gawai Kapit 2023.

LULONG… Marenny mujur menggi gelar Lulong ba Pekit Kumang Gawai Dayak Kapit 2023.

PENELEBA BEREGA

Lebuh dirandau, Marenny madahka diri chukup betuah malam pekit nya diatur laban mujur menggi gelar Lulong enggau pemekit pengelandik pemadu manah.

“Enggau ati ti semampai ensuruk sereta nunduk, aku deka ngenataika apresiasyen enggau pengaga ati sepemanjai tubuh melan tu ngambi bagi ba pengawa ngenanka adat enggau budaya bansa Iban.

“Lalu lebuh Pekit Kumang Gawai Dayak pampang Kapit, tudah diri udah mujur ngemai gelar Lulong Gawai Dayak Kapit kena taun 2023.

“Dulu agi, aku deka meri terima kasih besai ngagai apai indai tauka diri sebilik laban semampai nyukung, nyadi tiang pemun ba genap pengawa ke deka dikereja aku.

“Terima kasih ke pemadu mayuh mega ngagai bala kaban ti semampai ngerantangka tapa, dipeda tubuh bisi dia nawing tubuh lemi tu sepemanjai atur pekit tu dipejalai kelebih agi ngagai Floren Sayong.

“Ambis jaku kena niu, ambis leka kena meda pen enda ulih mandangka pengaga ati madahka kita semampai bisi enggau aku,” ku jaku terima kasih Marenny nuju bala ti udah nyaup iya sepemanjai pekit tu diatur.

Iya mega madah, nuju Justin Williamson Ujang enggau Rimon, nadai jaku ulih dirintai, nadai leka ulih disanggai dikena meri terima kasih ke pemadu besai ngagai seduai.

TUKANG ANTA… Justin Williamson nyadi tukang anta enggau tukang kebat Marenny lalu disaup Rimon.

NERIMA MAYUH SUKUNG

Nampung baru randau, ku Marenny, kebuah pia laban seduai udah kiruh, udah ibuh nyadi tukang mua, tukang anta enggau buk sereta tukang kebat ti pemadu manah.

“Enda jera, anang enda laban seduai orang ti chukup manah enggau begulai.

“Ditu mega, sapa bagi sida ke deka begunaka tukang anta, tukang buk enggau tukang kebat.

“Kita tau nanya, tau pelepa laban asil keranjai jari enggau kereban duai chukup manah enggau manding enda lebu, enggai badu meda sereta muji.

“Enda ditinggal mega ngagai kaban belayan ke ba ulu, ba ili, ke dikelala tauka enda kelala sekalika nya bala tauka rindu meda tetap diberi terima kasih besai laban udah nyukung aku.

“Jaku sukung, motivasyen enggau pengerindu kita nyadi bekal maya ati kesal, pesindang maya tubuh lemi, penabat dabung nyawa asai sekat.

“Terima kasih mega ngagai komiti ti bejadika pengawa Pekit Kumang Gawai Dayak Kapit.

“Bala indai kumang ti chukup ibuh sereta kiruh ke semua pemekit sepemanjai pengawa tu dipejalai.

“Terima kasih ti pemadu besai. Enda alah dirintai nama, enda ulih ditusi semua sida,” ku jaku pengaga ari Marenny.

Ku iya, semina ngena jaku terima kasih ti pemadu besai dirantang, anang badu anang leju meri sukung ba pekit bukai laban sukung semua kita ngerandang jalai.

NGETAN ADAT IBAN

Kelimpah ari nya, penegut sukung tau nyadika titi ngambi adat enggau budaya kitai Iban enda lenyau ditelan jeman baka wi tampung tali, baka rutan tampung dadan.

Marenny mega madah, asil gambar ke manah sereta manding dipandangka nya asil jari enggau kamera Sebastian Segumal.

Terang iya, asil jari nya chukup manah nadai alai mantah. Terima kasih ke pemadu besai laban semampai kiruh enggau ibuh.

“Aku ngeleka jaku apresiasyen ditu enggau tusun sepuluh jari nyema leka enggi aku bisi enda berurun, penemu enggi aku bisi enda chun, anang meh kita lalu nganu sereta renjan tang seruri meh aku enggau jaku tangkan.

“Terima kasih. Tuhan merekatka semua kitai,” ku iya.

Lebuh ditanya pasal pemesai enggau pemanah ngatur pekit kumang, Marenny madahka pekit kumang nya dikena ngerandangka jalai, ngerantangka tikai numbuhka siti pelasar besai ngetanka adat enggau budaya Iban.

Terang Marenny, ari pengawa ngatur pekit baka tu, adat enggau budaya Iban deka dikemeran bansa kitai lalu deka dikelala raban bansa bukai ba genap sukut.

“Nya udah nyadi siti chara ti ngemai reti ngambi adat enggau budaya kitai enda lenyau ditelan jeman semampai entiti entali baka wi tampung tali, baka rutan tampung dadan.

“Juluk ati aku senentang pengawa pekit Kumang tu iya nya ngarapka pengawa pekit tu semampai diatur lalu ulih dibai ke tikas ti tinggi agi.

“Lalu begunaka pengulih media rama ngambi ulih narit ati raban bansa bukai sereta nyadika chuan rebak dudi ngambi bagi ba atur pekit baka tu,” ku iya.

TEMEGAH… Marenny temegah mujur ngempu perais gelar Lulong enggau pemekit pengelandik pemadu manah.

JAKU PERANSANG

Marenny mega madah, iya masuk pekit kumang tu enda nyalah baka rambai jaku ‘enti ukai kitai sapa agi, enti ukai diatu kemaya agi’.

Peransang enggau pesan Marenny ngagai rebak baru nya anang leju, anang badu ngambi bagi ba pengawa ngetan enggau nyaguka main asal bansa Iban.

“Semampai penuhka diri enggau penemu senentang adat enggau budaya Iban enggau malin ti chukup, penuh sanding penemu sekalika ba orang tuai tauka ba sukut pelajar.

“Ambika banding, kitai meseti bisi pengingin ati belajar bemacham main asal kitai Iban.

“Baka tudah diri enda nyangka tau bulih gelar Lulong enggau pemekit pengelandik pemadu manah laban leka pantun ditengkebang aku empu udah narit ati bala akim.

“Naka ulih nambah anak penemu diri senentang adat enggau main asal kitai Iban.

“Tau tanya, tau dingaka ensera enggau mayuh litaricha Iban ti bukai laban ari nya mayuh tusun pengawa asal Iban sereta pugu pemun penemu adat enggau budaya Iban ti betiti entali sampai ke sehari tu ngambi perkara ke ditusuika kitai betampung enggau engkeman ngagai rebak ke dudi.

“Kelimpah ari nya, anang ngetu, anang badu belajarka pengelandik, main asal enggau budaya Iban enggaika semua nya tau sulai, enda ngerembai, terebai nyau retai.

“Engka apin laun aku meri Selamat Ngintu Gawai Dayak nuju semua. Besampika ba hari besai tu kitai diberi pengelantang, penyenang enggau pengerai,” ku Marenny nyimpul randau.

BERITA LAIN

2,000 belanda seraya ngintu rampa menua

KUCHING: Urung 2,000 penyereta ngulu program belanda pengasih besuluka jaku Run To Save Lives 4.0 ti belabuh ba mua Majlis Bandaraya Kuching Selatan (MBKS), ditu

BERITA TERBARU

Rose Blackpink sertai The Black Label

PENYANYI KOREA, Rose Blackpink menandatangani kontrak pengurusan dengan The Black Label, diketuai oleh penerbit Teddy. “Kami menandatangani kontrak pengurusan dengan artis Rose. “Penerbit Teddy dan

Pentas peragaan sentuhan Syafiq Kay

AKSI, kecekapan dan keanggunan pentas peragaan penting untuk menyerlahkan ratu cantik. Jurulatih pentas peragaan Sarawak, Shafi k Kay menyertai bidang peragaan dan kecantikan ratu cantik