Mesin hemodialisis baru pemeri ungkup mensia mayuh

KUCHING: Palan Hemodalisis Yayasan Tungkul Sengayuh Menua (NKF) Kota Samarahan nerima sebuah unit mesin hemodialisis berega RM40,000 ari OCBC Bank (Malaysia) nengah kerejasama Kelab Rotary Kuching (RCK).

Menteri Kaunsil Kandang Menua enggau Pengawa Berumah Datuk Sri Prof Sim Kui Hian madahka tu siti ari tanggung pengawa ti chukup manah ari serikat peribit ngagai mensia mayuh.

“Sebuah mesin deka meri pengelantang ngagai 72 iku pesakit tungkul sengayuh ti nyadi penguna mendam mesin hemodialisis.

“Siku pesakit buah punggung mesti diperubat ngena mesin nya tiga ngagai empat jam sehari lalu mesti berubat tiga kali seminggu,” ku iya.

Kui Hian bejaku munyi nya ba Program Nyerahka Bantu Mesin Hemodialisis Ngagai NKF Kota Samarahan di NKF Pampang Kuching ditu, kemari.

Iya madahka enggau bantu mesin nya siku pesakit ulih idup 20 ngagai 70 taun nyema nerima perubat ke meruan.

“Enti nadai mesin tu, pesakit nya deka sakit raya, koma sereta ngujungka iya parai.

“Nya alai ari mit kitai anang enda nyaga pengerai baka kurang makai pemakai ti manis, ai ngundan gis enggau ke bukai,” ku iya.

Tandu Kui Hian, ninting taun urung 300 iku pesakit tungkul sengayuh baru dirikodka lalu sida nya begunaka mesin hemodalisis dikena berubat.

“Kelimpah NKF, Sepital Besai Sarawak, gerempung ukai dikuasa perintah (NGO) mega bisi nyendiaka keresa hemodialisis tu.

“Pia mega, Perintah Sarawak bisi meri bantu ngagai pesakit buah punggung ti nadai belanja ngulihka subsidi berubat nyentukka RM600 sebulan.

“Pekara tu digaga ngambika nadai siku rayat Sarawak ti napi penyakit tungkul sengayuh enda ulih berubat ketegal nadai belanja,” ku iya.

Sama bisi datai Presiden RCK Mona Abdul Manap, Mandal Presiden Gerempung Buah Punggung Sarawak Dr Simon Wong, Senior Menijar OCBC Bank Sarawak Jessie Lim Pei Lian enggau ke bukai.

Suara Sarawak