Mesti bejimat lebuh ngena arus penyambung

MULU: Peranak di Long Terawan enggau palan bukai ti kena bungkur Program Rentayan Penyambung Menua Pesisir Sarawak (SRBN) dipinta nguna arus penyambung enggau manah.

Kepala Menteri Datuk Patinggi Abang Johari Tun Openg madahka arus penyambung nya tau disemaka baka lungga ke tau medis enti salah guna.

Ku iya, ngena arus penyambung mega sempama baka orang ti benung bebelaka pemakai ba dapur ngena lungga, enti ilap tau ngasuh telih.

“Lungga beguna lebuh kitai mela pemakai tang enti kitai salah guna, lungga nya tau mega medis kitai empu.

“Baka nya mega, enti tuju manah, arus penyambung ulih meri pemaik sereta tau dikena nambahka penatai pemisi, tang enti salah guna arus penyambung tau pulaika pemedis,” ku iya.

Abang Johari bejaku munyi nya rambau bejadika SRBN di Long Terawan ditu, tadi.

Suara Sarawak